MDB

Ana səhifə

MDB

Marneulinin mərkəzində yeni yanacaqdoldurma məntəqəsi açılıb

04 avqust 2010 21:17 (UTC +04:00)

Marneuli. Nizami Məmmədzadə-APA. Bu gün azərbaycanlıların kompakt yaşadığı Marneuli şəhərinin mərkəzində yeni tikilmiş yanacaqdoldurma mərkəzinin açılışı olub. APA-nın Gürcüstan bürosunun məlumatına görə, yeni yanacaqdoldurma mərkəzinin açılışını ARDNŞ-in Gürcüstan nümayəndəliyinin rəhbəri Mahir Məmmədov və Kvemo-Kartli bölgə qubernatoru David Kirkitadze həyata keçirib. Bu, sayca 43-cü yanacaqdoldurma məntəqəsidir.

«Mən çox şadam ki, nəhayət Marneulinin mərkəzində belə gözəl və müasir standartlara cavab verən yanacaqdoldurma məntəqəsi açılıb. SOCAR Gürcüstanda ən keyfiyyətli yanacaq satır. Bu, bizi sevindirir. Bununla bərabər burada Azərbaycan restoranı və konfrans zalı açılacaq. Sevinirəm ki, Marneuli regionuna SOCAR belə bir obyekt tikib», deyə Kvemo-Kartli bölgə qubernatoru APA-ya bildirib.

ARDNŞ-in Gürcüstan nümayəndəliyinin rəhbəri Mahir Məmmədov APA-ya bildirib ki, Marneuli onlar üçün əsas yaşayış ərazilərindən biridir: «Burada 90 faiz azərbaycanlı yaşayır. Burada açdığımız hər bir yanacaq doldurma məntəqəsi soydaşlarımız üçün yeni iş yerləri deməkdir. Qeyd edim ki, hər dəfə belə məntəqə açılanda 16-17 nəfər soydaşımız iş ilə təmin olunur. Biz Azərbaycanda bərqərar olmuş biznes mədəniyyətini buraya gətiririk. Bugünkü tədbir ulu öndərin təməlini qoyduğu neft strategiyasının təntənəsidir. Biz şirkət tərəfindən çay evi də almışıq. Burada azərbaycanlıların istirahət etməsi, mədəni səviyyələrini artırmaq üçün rekonstruksiyaya başlayacağıq. Biz istənilən şərait yaradacağıq. Bu, Marneulidə ilk yanacaq doldurma məntəqəsidir. Planlarımız böyükdür. Marneulidə, Bolnisidə 5 yerdə yanacaq doldurma mərkəzləri açılacaq. Şulaveri-Sadaxlı və Faxralı, Kvemo-Bolnisi istiqamətində də belə obyektlərimiz tikiləcək. Üç gündən sonra Marneulinin Qızılhacılı kəndində yeni məntəqənin istifadəyə verilməsinin açılışı olacaq. Biz eyni zamanda Marneulidə Gənclər Mərkəzini almışıq. Burada gənclərlə aparılan işi yenidən qurmalıyıq. Hazırda Gənclər Mərkəzində işlər sona çatmaq üzrədir. Torəmə şirkətimiz Gürcüstanda ən iri vergiödəyicidir. Bu, reallıqdır. Biz birinci üçlükdə möhkəm oturmuşuq. Qeyd edim ki, bu böyük uğurlarımızın nəticəsidir».

Marneulidə yeni yanacaq doldurma məntəqəsinin açılışında SOCAR-Petroliumun direktoru David Zubitaşvili, Marneuli rayon icra hakimiyyətinin başçısı Zaza Dekonoidze, Marneuli rayon bələdiyyəsinin sədri Ayvaz İsmayılov və ARDNŞ-in Gürcüstan nümayəndəliyinin rəsmiləri, ictimaiyyət nümayəndələri iştirak ediblər.