MDB

Ana səhifə

MDB

Batumidə Gürcüstanın hərbi sahədə həyata keçirdiyi islahatlar müzakirə olunur

02 fevral 2011 20:47 (UTC +04:00)

Batumi. Nizami Məmmədzadə-APA. Bu gün Batumidə keçirilən konfransda Gürcüstanın hərbi sahədə həyata keçirdiyi islahatlar müzakirə olunur. APA-nın Gürcüstan bürosunun məlumatına görə, tədbirdə NATO-nun beynəlxalq hərbi xidmət direktoru, ABŞ-ın Müdafiə Nazirinin müavini, Gürcüstanın Müdafiə Naziri və Avropa və Avroatlantik strukturlara inteqrasiya üzrə dövlət naziri, eyni zamanda QHT təşkilatları iştirak ediblər.
Gürcüstanın Müdafiə Naziri Baço Axalaya bildirib ki, NATO-nun və ABŞ-ın yüksək çinli məmurlarının iştirak etdiyi konfransda NATO-nun Lissabon sammitindən sonra əmələ gələn qlobal təhlükələr, müdafiə və təhlükəsizlik məsələləri, eyni zamanda müdafiə sahəsində aparılan islahatlar müzakirə edilir. "Biz keçirilən bu konfransdan çox razıyıq. Bu tədbirdə iştirak edən nümayəndələr, bizim tərəfdaşımız olan ABŞ və NATO-ya üzv olan ölkələr bizim müdafiə sahəsində islahatlar haqqında götürdüyümüz kursu birtərəfli dəstəkləyirlər. Biz hesab edirik ki, bu mərhələdə islahatlar uğurla gedir", deyə Baço Axalaya qeyd edib.

Avropa və Avroatlantik strukturlara inteqrasiya üzrə dövlət naziri Georgi Baramidze də bu gün keçirilən konfransın işini yüksək qiymətləndirib. "Biz qlobal təhlükəsizlik barədə məsələləri, eyni zamanda Gürcüstanın NATO-ya inteqrasiya prosesi və təhlükəsizlik və müdafiə sahəsində ən vacib tərkib hissə olan islahatları müzakirə edirik", deyə Baramidze bildirib.