MDB

Ana səhifə

MDB

Gürcüstanda Ermənistan-Azərbaycan münaqişəsinin həllində Gürcüstanın vasitəçilik rolu: “lehinə” və “əleyhinə” mövzusunda tədbir keçirilib

09 mart 2011 18:47 (UTC +04:00)

Marneuli. Nizami Məmmədzadə-APA. Bü gün Marneuli rayonunun Azərbaycan və Ermənistanla həmsərhəd kəndi olan Təkəli kəndi yaxınlığında Azərbaycan, Gürcüstan və Ermənistandan gələn ictimaiyyat nümayəndələri, hər üç ölkənin jurnalistləri, gürcü QHT nümayəndələri, ekspertlər və konfilktoloqların iştirakı ilə “Ermənistan-Gürcüstan münaqişəsinin həll edilməsində Gürcüstanın vasitəçilik rolu” mövzusunda tədbir keçirilib. APA-nın Gürcüstan bürosunun məlumatına görə, tədbir simvolik olaraq məhkəmə üslubunda baş tutub. İlk öncə Gürcüstan parlamentinin deputatı, avrointeqrasiya komissiyasının sədri David Darçişvili çıxış edərək görüşün çox maraqlı və mürəkkəb bir məsələnin həlli üçün təşkil edildiyini bildirib. “Münaqişələrin həllində ən başlıcası, bir-birinin etibarını qazanmaq lazımdır. Mən bu tədbirdə parlamenti təmsil etdiyimə görə, ekspert-şahid kimi çıxış edirəm. Mənim burada iştirak etməyimi rəsmiyyət kimi başa düşürlər. Lakin bu ictimaiyyətin tədbiridir. Qafqazda münaqişələr birdən-birə həll olunmur. Hələlik suveren struktur və dünya arasında anarxiya mövcuddur. Bu, bir tərəfli işdir. Əlbəttə beynəlxalq təşkilatların bu münaqişələr barədə kifayət qədər məlumatı var və bu münaqişələr zamanı zəbt edilən torpaqlar işğal edilmiş hesab olunurlar. Cənubi Qafqazda biz bu münaqişələrlə tez-tez rastlaşırıq. Lakin onların həlli uzanır. Nəticədə münaqişənin həlli münaqişəli qalır. Qarabağ münaqişəsinin özünəməxsus unikal cizgiləri var. Cənubi Qafqazda olan digər münaqişələrin də çoxregionlu oyunçusu var. Bu, kimlərinsə maraqlarını təmin edir. Bunu ictimaiyyətin gücü ilə həll etmək olar. Lakin hələlik ictimaiyyət siyasi strukturlarla dil tapa bilmir. İctimaiyyət nümayəndələri indi yalnız ideyalar irəli sürürlər. Bu ideyalar bəzən inkişaf gətirir. Vaxt olacaq ki, gec-tez bu ideyalar siyasi strukturlar tərəfindən qəbul olacaq”.
Sonra tədbirdə Qeorgi Xutsişvili “Gürcüstan Qarabağ münaqişəsinin sülh yolu ilə həll edilməsində mediator rolunu oynaya bilər” mövzusunda, Mamuka Araşidze isə “Gürcüstan bu münaqişənin həllində mediator rolunu oynaya bilməz” mövzusunda çıxışlar ediblər. Hər iki ekspert Gürcüstanın Qarabağ münaqişəsinin həllində rolunun vacibliyini və ya bu rolun baş tutub-tutmayacağını tutarlı faktlarla əsaslandıraraq öz fikirlərini söyləyiblər.
Sonra məruzələr ətrafında fikir mübadiləsi aparılıb və şərhlər dinlənilib. Şərhlərdə və sualların verilməsində Marneulidə və Tiflisdə fəaliyyət göstərən azərbaycanlıların rəhbərlik etdikləri QHT təşkilatları yüksək səviyyədə fərqləniblər. Erməni QHT və ictimaiyyət nümayəndələri zəif çıxış ediblər. Şərhlərdə Azərbaycanı təmsil edən jurnalistlər və alimlər (Rəhim Əliyev, Niyazi Mehdi) də qatılıblar.
Sonra məruzələrə əsasən səsvermə aparılıb. Gürcüstanın Ermənistan – Azərbaycan münaqişəsində vasitəçilik rolu baş tuta bilər məruzəsinə - 28 nəfər səs verib, Gürcüstan münaqişədə mediator rolunu oynaya bilməz məruzəsinə -9 nəfər səs verib , 2 nəfər bitərəf olub.
Tədbirdə qeyd olunub ki, ümumi şəkildə götürəndə prosesin həllində Gürcüstan iştirak edə bilər, lakin birinci rolda yox. Tədbirdə Azərbaycan münaqişənin həllində Gürcüstanın vasitəçilik rolunu qəbul edir, lakin Ermənistan Gürcüstanın mediator rolunu qəbul etmir. Tədbirdə sual verən erməni jurnalistlərindən biri bunu nəhəng beynəlxalq layihələrin Gürcüstandan keçməsində və Gürcüstanın bu beynəlxalq layihələrdə iştirak etməsini əsas gətirərək mediator rolunun şəffaf olmayacağını vurğulayıb.