MDB

Ana səhifə

MDB

Gürcüstanda azərbaycanlı məktəb direktorları gürcülərlə əvəz oluna bilər

14 mart 2011 20:55 (UTC +04:00)

Tiflis. Nizami Məmmədzadə-APA. Gürcüstanda məktəb direktoru vəzifəsini tutmaq istəyən 65 yaşından aşağı olan ali təhsilli şəxslər təhsil və elm nazirliyinin təşkil etdiyi müsabiqəyə qatıla bilər. APA-nın Gürcüstan bürosunun məlumatına görə, direktorluğa namizədlər martın 20-dək Gürcüstan elm və təhsil nazirliyinin milli imtahan mərkəzinin saytında qeydiyyatdan keçməlidir. Artıq namizədlərin qeydiyyatı başlanıb. Məlumata görə, qeydiyyatdan keçən namizəd bankdan 35 larilik qəbz almalı, ali təhsil haqqında diplom və pasportun surətini təhsil resursları mərkəzinə təqdim etməlidir.
Bəzi azərbaycanlı məktəb direktorları APA-ya imtahan vermək istəmədiklərini bildiriblər. Marneuli rayon təhsil resursları mərkəzinin rəhbəri Kamandar İsmayılov APA-ya açıqlamasında bildirib ki, hər bir Gürcüstan vətəndaşı olan ali təhsilli şəxs direktorluğa öz namizədliyini irəli sürə bilər. “Bunun üçün qeydiyyatdan keçməli və direktor vəzifəsini tutmaq üçün gürcü dilində imtahan verməlidir. Martın 20-dək qeydiyyat bitməlidir. Marneuli rayonunda 20-dən çox şəxs müsabiqədə iştirak etmək üçün ərizə verib. Lakin azərbaycanlılar müsabiqəyə həvəslə getmirlər. Məndə olan məlumata görə, müsabiqə imtahanları martın 31-də milli imtahan mərkəzində keçiriləcək. İmtahanlar fərdi şəkildə, kompüterdəki suallara cavab verməklə başlayacaq. Həmin gün kimin müsabiqədən keçdiyi bilinəcək. Azərbaycan məktəblərinin direktorları və ya digər etnik azlıq nümayəndələri imtahan verərkən Gürcüstan qanunvericiliyi və təhsilə aid digər qanunauyğunluqlar barədə, eyni zamanda iş zamanı gündəlik rastlaşdıqları məsələlərə aid təşkil edilən suallara da cavab verəcəklər. Amma azərbaycanlı direktorların çoxu bu dili zəif bilirlər. Dili zəif bilməklə imtahanlardan keçmək çətin olacaq. Bu vəzifəni tutmaq üçün 100-ə qədər bal toplamaq lazımdır. İmtahanda yüksək bal toplayan şəxslər nazirliyin təqdimatı ilə məktəblərdə fəaliyyət göstərən qəyyumlar şurasına təqdim olunacaq. Namizədin direktor vəzifəsində çalışması üçün əsas qərarı isə qəyyumlar şurası verəcək. Bu, baş tutmadıqda isə təhsil naziri öz əmri ilə hər hansı məktəbə direktor göndərəcək”.
Qeyd edək ki, bəzi Azərbaycan dilli məktəblərin direktorları artıq könüllü surətdə öz vəzifələrindən imtina edirlər. Onlar APA-ya açıqlamalarında imtahanların Azərbaycan dilində aparılmağını istədiklərini vurğulayıblar. “Bunu isə heç kim həyata keçirmək istəmir. Biz öz dilimizdə olan suallara cavab verməyə hazırıq. Lakin gürcü dilində heç gürcülərin özləri belə imtahan verə bilmirlər”.
Xatırladaq ki, azərbaycanlıların kompakt yaşadığı Marneuli rayonunda 50 Azərbaycan dilli məktəb fəaliyyət göstərir.