MDB

Ana səhifə

MDB

Erməni “ekspert”lərini Gürcüstana qoyulan investisiya narahat edir

15 mart 2011 19:16 (UTC +04:00)

Tbilisi. Nizami Məmmədzadə-APA. Ermənilər Gürcüstanın daxili işlərinə qarışmağa davam edirlər. APA-nın Gürcüstan bürosunun məlumatına görə, erməni “ekspertləri”ni Gürcüstana qoyulan investisiya narahat edir. “Ekspertlərin” fikrincə, onların dedikləri Samsxe-Cavaxeti bölgəsində çoxluq təşkil edən erməni mənşəli Gürcüstan vətəndaşlarına aiddir. Son vaxtlar bu regiona xaricdən edilən separatist elementlərlə dolu proseslər fəallaşıb. Erməni separatçılarının “Böyük Ermənistan” ideyası onların fikrincə, Gürcüstanın bu tarixi bölgəsindən keçir”. Bu sözləri APSN.GE saytı dərc edib.
Erməni separatçılarını hətta Gürcüstana qoyulan investisiyasının “qoxu”su narahat edir. “Tarix elmləri namizədi, ekspert” Vahe Sarkisyanı da Türkiyə və Azərbaycanın Gürcüstana dair investisiya siyasəti narahat edir. Onun sözlərinə görə, son nəticədə bu regionun müsəlmanlaşdırılmasına səbəb olacaq. “Cavaxetiyanın iki əsas çayı olan Pərvanə və Kürdə bu gün sürətlə hidroelektrik stansiyaları tikilir. Bu obyektləri maliyyələşdirən Türkiyə və Azərbaycan şirkətləridir. Bu şirkətlər həmin layihələri ABŞ-ın “Minilliklərə çağırış” layihələrinə elan etdiyi tenderdə udublar. Bütün bunlar Cavaxetiyada müsəlman bazisi yaradır -” şənbə günü Sarkisyan mətbuat konfransında deyib.
Ekspertin sözlərinə görə, əsrin əvvəllərində Gürcüstanın cənubunda yerləşən Kvemo-Kartli bölgəsində əhalinin sayı 20-25 min idisə, bu gün 350-400 min nəfərə çatıb. “Bu Ermənistanın şimal sərhədlərinə real təhlükədir. Əgər belə davam edərsə, Ermənistan öz ordusunu Ermənistan-Gürcüstan sərhədində yerləşdirməyə məcbur olacaq” o, belə hesab edir.

“Ekspert” başqa bir misal gətirir. O, Zalqa rayonunda ermənilərin çoxluq təşkil etdiyini və burada dörd azərbaycanlı kəndinin olduğunu, bu gün isə onların yeddi olduğunu bildirir. APA-nın Gürcüstan bürosunun araşdırdığına görə, hazırda Zalqada dörd kənd - Ərcivan Sarvan, Tecis və Qızılhacılı kəndlərində azərbaycanlılar yaşayır. Zalqada yaşayan azərbaycanlıların məlumatına görə, əvvəllər Minəsazlı və Nəbilər adlı kəndlər olub. Hazırda o kəndlərdə heç kim yaşamır və kəndlər tamamilə yox olub. Lakin son illər rayona Acarıstandan acar ailələri köçürülüb. Erməni “ekspert“i bu ailələri də azərbaycanlı hesab edir. (!?)
Sarkisyan Cavaxetiyaya Məhsəti türklərinin köçürülməsi siyasətinə də toxunub. “Bu gün Axalsıx şəhərində 30 məhsəti türkü ailəsi var. Bu köçürülmə Gürcüstanın Avropa Şurası qarşısında götürdüyü öhdəliklərlə əlaqədardır. Məhsəti türklərinin bu regiona köçürülməsi Cavaxetiya üçün fəlakət olacaq və ermənilər regionu tərk etməyə başlayacaqlar.”
“Ekspert”in fikrinə görə, problemləri həll etmək üçün Cavaxetiyada milli strategiyanı həyata keçirmək və erməni şirkətlərinin investisiyasını buraya cəlb etmək lazımdır. “Əks halda ermənilər kütləvi şəkildə regionu tərk edəcək, Ermənistan üçün problemlər yaranacaq. Cavaxetiyanın strateji vacibliyi və burada yaşayan erməni icması Ermənistan üçün qiymətlidir. Sərhəddə yaşayan Cavaxetiya sakinləri olan erməni icmaları özlərini həmişə Ermənistanın real hissəsi hesab edirlər, -” Sarkisyan vurğulayıb.