MDB

Ana səhifə

MDB

Novruz bayramı Gürcüstanda dövlət səviyyəsində qeyd olunub

18 mart 2011 04:35 (UTC +04:00)

Tbilisi. Nizami Məmmədzadə-APA. Gürcüstan paytaxtında AZEBİ təşkilatının təşkilatçılığı və ARDNŞ-in Gürcüstan nümayəndəliyinin dəstəyi ilə “Soplis saxli” (“Kəndin evi”) restoranında Novruz bayramı münasibəti ilə Gürcüstan və Azərbaycan mədəniyyət işçilərinin hazırladığı geniş və maraqlı konsert proqramından ibarət tədbir keçirilib. APA-nın Gürcüstan bürosunun məlumatına görə, tədbiri Azərbaycanın Gürcüstandakı səfirliyinin hərbi attaşesi Elbrus Orucov açaraq Novruz bayramı haqqında iştirakçılara məlumat verərək qeyd edib ki, bu tədbir ilk dəfə olaraq Gürcüstan dövləti tərəfindən rəsmi şəkildə qeyd olunur və gürcü və Azərbaycan xalqının nümayəndələri birlikdə Novruz bayramını Novruz adət və ənənələrinə görə qarşılayırlar. Tədbirə Gürcüstan Universitetinin Himayədarlar Şurasının sədri, Qafqaz Dostluq Evinin rəhbəri, Gürcüstan Prezidentinin anası xanım Giuli Alasaniya qatılıb və Novruz bayramı münasibəti ilə Azərbaycan xalqını və eyni zamanda bu bayramın Gürcüstanda rəsmi dövlət bayramı olduğuna görə, bu ölkədə yaşayan bütün xalqları Novruz bayramı münasibəti ilə təbrik edib.
Giuli Alasaniya jurnalistlərə bildirib ki, bu bayram təkcə azərbaycanlıların bayramı deyil. “Bu, həm də dövlət bayramıdır. Bunun üçün mən çox şadam. Novruz-yaz bayramıdır. Bu, yeni gün, oyanış deməkdir. Bunun üçün mən hamıya uğurlar arzulayıram.”
Novruz bayramı münasibəti ilə keçirilən tədbirdə, AZEBİ-nin icraçı direktoru Qaratel Allahverdiyeva, ARDNŞ-in Gürcüstan nümayəndəliyinin rəsmisi Arif Əliyev, Azərbaycan səfirliyinin müşaviri Şövqi Mehdizadə, Gürcüstanın biznes Ombudsmanı Giorgi Pertaya, “Borçalı” cəmiyyətinin sədri Zəlimxan Məmmədli və başqa qonaqlar çıxış ediblər.
Həmin gün Tiflisdəki Şota Rustaveli adına Dram Teatrında Novruz bayramına həsr edilən möhtəşəm konsert baş tutub. Tədbirdə “Ceyran” və “Sarvan” folklor rəqs və mahnı ansamblları mənalı proqramlarla çıxış edərək bayram iştirakçılarının dəfələrlə alqışlarını qazanıblar. Tbilisi şəhərin meri Qiqi Uqulava tədbirdə çıxış edərək Novruz bayramının gözəl bir bayram olduğunu və bu bayramı Tiflis şəhərin azərbaycanlılar yaşayan ərazilərdə də rəsmi şəkildə geniş qeyd olunduğunu bildirib. O, bu gün Saburtalo rayonunda azərbaycanlılarla görüşdüyünü və onları Novruz bayramı münasibəti ilə təbrik etdiyini və onların problemlərini dinlədiyini bildirib.
Tbilisidəki “Soplis saxli” (“Kəndin evi”) restoranında Gürcüstan parlamentinin nümayəndələri, Gürcüstanda akkreditə edilən dipkorpus nümayəndələri, beynəlxalq təşkilatlar, nazirliklər və digər təşkilatların nümayəndələri, Tbilisiyə yaxın rayonlarından gələn soydaşlarımız və Bakıdan gələn qonaqlar iştirak ediblər.
Xatırladaq ki, keçən ilin martın 23-də Novruz bayramı rəsmi şəkildə ölkə prezidentinin 187 saylı fərmanına əsasən Bayram Günü elan edilib.