MDB

Ana səhifə

MDB

Aİ-Rusiya sammitində Moskvanın tərəvəz idxalına qoyduğu qadağa müzakirə olunacaq

10 iyun 2011 02:35 (UTC +04:00)

Bakı-AA. Bu gün Rusiyanın Nijni Novqorod şəhərində Avropa İttifaqı - Rusiya sammitinin rəsmi hissəsi keçiriləcək.
APA-nın bbc.com saytına istinadən sammitin gündəliyində enerji əməkdaşlığı, viza məsələsi durur.
Bununla yanaşı görüşdə Moskvanın Avropa İttifaqından gələn tərəvəz məhsullarına iyunun 2-də qoyduğu qadağa da əsas müzakirə obyektlərindən birinə çevrilə bilər.
Rusiya müvafiq qadağanı Avropada aşkarlanmış bağırsaq infeksiyasının yayılmasına görə qoyub. Bu xəstəlikdən Avropada artıq 20-dən artıq insan həlak olub, xeyli sayda insan infeksiyaya yoluxub.

Ehtimal edildiyinə görə, infeksiyaya baiskar tərəvəz məhsulları ola bilər. Moskva Avropa tərəvəzini öz bazarına qoymur, artıq Rusiyaya gətirilmiş tərəvəz məhsulları isə satışdan çıxarılır.
Avropada Rusiyanın bu addımını qeyri-mütənasib adlandırıblar. Habelə Brüsseldə bildiriblər ki, Moskvanın qadağası Rusiyanın yaxın gələcəkdə qoşulmaq istədiyi Beynəlxalq Ticarət Təşkilatının ruhuna ziddir. Rusiyaya idxal olunan tərəvəz məhsullarının təxminən 20 faizi Avropa İttifaqından gəlir, odur ki, Rusiya Avropa İttifaqının ən aparıcı tərəvəz bazarlarındandır.

Rusiya Avropa İttifaqından ildə 4 milyard avroya qədər dəyərdə meyvə və tərəvəz idxal edir. Bu arada Rusiyanın baş naziri Vladimir Putin bəyan edib ki, Rusiya Beynəlxalq Ticarət Təşkilatının ruhuna görə "adamları zəhərləməyəcək".
Bu arada Rusiyanın əlaqədar orqanları Avropadakı tərəfkeşləriylə artıq danışıqlara başlayıblar. Rusiyanın Baş sanitar həkimi Gennadi Onişşenko bildirib ki, Avropa İttifaqıyla Rusiyanın tərəvəz məsələsində mövqeləri yaxınlaşıb.

Bildirilir ki, xüsusilə Hollandiya və Danimarkayla mövqelər yaxınlaşıb və bu ölkələrdən gələn tərəvəzə yaxınlarda yaşıl işıq yandırıla bilər. Hollandiya Rusiyaya əsas tərəvəz ixracatçılardandır. Lakin hələlik tərəvəz qadağası öz qüvvəsini saxlayır.

Öz növbəsində Avropa Komissiyasında bildirilir ki, İttifaq ticarət məsələsində vahid bir birlikdir və danışıqlar ancaq bu və ya digər ölkələri əhatə etməməlidir. Tərəvəz məsələsi ən yüksək səviyyəyə Aİ-Rusiya sammitinə çıxarılacaq. Sammit iyunun 10-na kimi davam edəcək.