MDB

Ana səhifə

MDB

Qubada «İnformasiya rəsmiləri üçün rəsmi sənədlərə çıxış» mövzusunda seminar keçirilib - FOTO

Qubada «İnformasiya rəsmiləri üçün rəsmi sənədlərə çıxış» mövzusunda seminar keçirilib - <font color=red>FOTO</font>

11 iyul 2011 14:04 (UTC +04:00)

Bakı-APA. Qubada Mətbuat Şurasının (MŞ) və Avropa Şurasının (AŞ) Azərbaycandakı nümayəndəliyinin təşəbbüsü ilə «İnformasiya rəsmiləri üçün rəsmi sənədlərə çıxış» mövzusunda iki günlük treninq-məşğələ keçirilib. Şuradan APA-ya verilən məlumata görə, tədbir hər iki qurumun birgə layihəsi çərçivəsində baş tutub. MŞ sədri Əflatun Amaşov rəhbərlik etdiyi qurumun AŞ ilə birgə layihəsinin məqsədləri barədə ətraflı məlumat verib. Ə .Amaşov layihə çərçivəsində növbəti seminarın iyulun 30-31-də Tərtər rayonunda baş tutacağını bildirib. Azərbaycanın ilk jurnalisti olan Abbasqulu ağa Bakıxanovun doğma yurdu Qubada belə mötəbər toplantıların təşkilini rayonda mediaya və ümumilikdə informasiya işinə həssas münasibətlə əsaslandıran Ə. Amaşov eyni dəst-xəttin digər rayon və şəhərlər üçün də vacibliyini önə çəkib.

Prezidentinin Administrasiyasının ictimai-siyasi məsələlər şöbəsinin sektor müdiri Vüqar Əliyev bu kimi tədbirlərin cəmiyyət üçün xüsusi önəm daşıdığını deyib, onların davamlılığının vacibliyini vurğulayıb: «Modernləşmə kursu dövlət orqanları və digər qurumlar qarşısında yeni vəzifələr qoyur. Bu baxımdan informasiya əldə etmək haqqında qanunvericiliyə riayət zəruridir. Mövcud istiqamətdə irəliləyişlər ictimaiyyətlə əlaqə şöbələrinin, mətbuat xidmətlərinin işinin təşkilində, onların veb-səhifələrinin yaradılmasında və təkmilləşdirilməsində özünü göstərməkdədir. Əslində belə layihələrin əsasında da həmin prosesə dəstək göstərmək və bir növ, qarşıdakı vəzifələri müəyyənləşdirmək dayanır. Əsas məsələ təbii ki, dövlət orqanlarının cəmiyyətin informasiya tələbatını ödəmələridir. Azərbaycan dövləti də bu yöndə əhəmiyyətli tədbirlər reallaşdırmaqdadır».
Quba Rayon İcra Hakimiyyəti başçısının I müavini Sahib Məmmədov rayonda bu kimi tədbirlərin təşkilinin ənənəyə çevrildiyini bildirib. MŞ-nin Qubada keçirdiyi silsilə toplantılardan söz açan S.Məmmədov rayondakı idarə, müəssisə və təşkilatların media ilə işinin qurulmasındakı xüsusiyyətlərə dair məlumatlar açıqlayıb.
Bakı Dövlət Universitetinin professoru, İctimai Teleradionun Yayım Şurasının sədri Cahangir Məmmədli mətbuat xidməti institutunun hər bir qurumun fəaliyyətindəki roluna diqqət çəkib. Təlimləri hollandiyalı ekspertlər - Devid van der Huoven və Fred Gijbels aparıblar. Onlar «İctimai informasiya rəsmilərinin rolu və mövqeyi», «Media və vətəndaşlarla interaktiv ünsiyyət», «Hökumət informasiyasına açıq çatım və onun nəticələri», «İnformasiyaya açıq çatımın bəzi hüquqi aspektləri», «Böhran vəziyyətlərində necə işləməli» mövzularında fikir və təcrübələrini bölüşüb, iştirakçıların suallarını cavablandırıblar. Seminar çərçivəsində həmçinin iştirakçılara Azərbaycan Respublikasının Baş Prokurorluğu və Mətbuat Şurasının birgə hazırladıqları «Jurnalistlər üçün hüquqi terminlər lüğəti» kitabı da paylanılıb.

Qeyd edək ki, seminarda Daxili İşlər, İqtisadi İnkişaf, Ekologiya və Təbii Sərvətlər, Vergilər, Təhsil nazirliklərinin, Qaçqınların və Məcburi Köçkünlərin İşləri üzrə Dövlət Komitəsinin, Dövlət Neft Şirkətinin, Dövlət Sosial Müdafiə Fondunun, “Azərsun Holdinq”in mətbuat xidmətlərinin nümayəndələri, eləcə də Quba, Qusar, Xaçmaz, Şabran, Siyəzən və Xızıdan olan dövlət orqanlarının media ilə əlaqələrə məsul şəxsləri iştirak ediblər.

Quba _ seminar _ media