MDB

Ana səhifə

MDB

Tiflisdə müdafiə və təhlükəsizlik məsələləri üzrə konfrans keçirilib

27 oktyabr 2011 23:28 (UTC +04:00)

Tiflis. Nizami Məmmədzadə-APA. Gürcüstan paytaxtındakı " Rеdisson " mehmanxanasında müdafiə və təhlükəsizlik məsələləri üzrə konfrans keçirilib. APA-nın Gürcüstan bürosunun məlumatına görə, tədbiri giriş sözü ilə baş nazirin müavini, Avropa və Avroatlantik strukturlara inteqrasiya məsələləri üzrə nazir Georgi Baramidze açıb. O, çıxışında Gürcüstanda islahatların həyata keçirilməsinin və NATO-ya yaxınlaşmaq prosesinin davam edəcəyini bildirib. Baramidze Gürcüstanın NATO-ya daxil olması üçün hazırlaşmaq mexanizminin olduğunu deyib. "Alyansa daxil olmaq üçün bizim bütün mexanizmlərimiz var. Bizə vacibdir ki, bu istiqamətdə islahatları həyata keçirək və daxil olmaq üçün həmişə hazır olaq. Biz bilirik ki, bir neçə ildən sonra Gürcüstan NATO-ya daxil olmağa hazır olacaq. Bundan sonra alyansın üzvləri olan ölkələr birlikdə qərar qəbul edəcəklər".
G.Baramidze Gürcüstanın bütün qonşularla dostluq əlaqələrinə hazır olduğunu qeyd edib.
"Bu bizim ərazi bütövlüyümüzü tanıdıqdan sonra Rusiyaya da aiddir,"- baş nazirin müavini qeyd edib.
Konfransda çıxış edən Gürcüstan Müdafiə Nazirinin müavini Nodar Xarşiladze bildirib ki, tədbirdə Gürcüstanda aparılan bir çox islahatlar da müzakirə olunacaq.
"Bu konfrans-nəinki müdafiə, həm də təhlükəsizlik məsələlərinə aiddir. Tədbirdə NATO-nun və bizə dost ölkələrinin nümayəndələri iştirak edir. Biz NATO-ya inteqrasiya prosesini və həyata keçirilən islahatları, eyni zamanda bu istiqamətdə bu il əldə etdiyimiz uğurlarımızı müzakirə edirik,-" Nodar Xarşiladze vurğulayıb.
Konfransda iştirak edən NATO-nun Baş katibinin Cənubi Qafqaz və Orta Asiya ölkələri üzrə xüsusi nümayəndəsi Ceyms Appaturay NATO-nun Gürcüstanda aparılan islahatları müsbət qiymətləndirdiyini deyib. Onun sözlərinə görə, Gürcüstan Buxarest sammitinə sadiq olduğuna görə alyansın üzvü olacaq. C. Appaturay ümidvar olduğunu bildirib ki, NATO-nun bu mövqeyi noyabr ayında Tiflisdə keçiriləcək Şimali Atlantik Şuranın iclasında və həm də 2012-ci ildə Çikaqodakı sammitdə səsləndiriləcək."