MDB

Ana səhifə

MDB

MDB ekspertləri əmək miqrasiyası sahəsində əməkdaşlıq məsələlərini müzakirə edəcəklər

14 noyabr 2011 21:56 (UTC +04:00)

Bakı-APA. Noyabrın 15-17-də Minskdə, MDB İcraiyyə Komitəsində 2020-ci ilə qədər olan dövrdə MDB-nin iqtisadi inkişaf strategiyasının birinci mərhələsinin (2009-2011-ci illər) reallaşdırılması üzrə tədbirlər planının I “Qarşılıqlı iqtisadi fəaliyyətin sistemyaradıcı sahələri” bölməsinin 2-ci “Əmək bazarı və miqrasiya prosesləri” yarımbölməsinin yerinə yetirilməsinin təmin edilməsi üzrə təkliflərin təkmilləşdirilməsi və razılaşdırılması üzrə işçi qrupun iclası keçiriləcək. Bu barədə APA Azərtac-a istinadən məlumat verir.

Ekspertlər iclasda dörd məsələni müzakirə edəcəklər. İlk növbədə əhalinin məşğulluğu və əmək miqrasiyası sahəsində qanunvericiliyin yaxınlaşdırılması prinsipləri haqqında sazişin layihəsi nəzərdən keçiriləcəkdir. Bu sənədə əsasən, Birlik ölkələri sosial və əmək sahəsində, əcnəbi vətəndaşların hüquqi vəziyyəti, əmək miqrasiyası və əhalinin məşğulluğu barədə qanunvericiliyin yaxınlaşdırılması üzrə iş aparacaqlar.
İşçi qrupun üzvlərinin müzakirə edəcəyi ikinci məsələ məşğulluq və yeni iş yerləri yaradılması proqramlarının həyata keçirilməsi mexanizmlərinin işlənib hazırlanmasına dair təkliflər layihəsidir. MDB üzvü olan dövlətlərdə bu proqramlar layiqli əməyin tətbiq sahələrini genişləndirmək, əmək resurslarından istifadənin səmərəsini artırmaq, iqtisadiyyatın kadr tələbatını təmin etmək, əmək bazarında tələb və təklifi tarazlaşdırmaq məqsədi ilə hazırlanır.
İclasda müzakirə olunacaq üçüncü məsələ milli əmək bazarlarının vəziyyəti və boş iş yerləri barədə informasiyanın monitorinqi və operativ mübadiləsi sisteminin yaradılmasına dair təkliflər layihəsidir. Monitorinq sistemi əmək bazarını səciyyələndirən mühüm göstəricilərin siyahısına uyğun olaraq formalaşan informasiya resursudur.
Ekspertlər tərəfindən müzakirəsi nəzərdə tutulan dördüncü məsələ MDB məkanında əməkçi miqrantların hüquqlarının müdafiəsini tənzimləyən çoxtərəfli hökumətlərarası sənədlərin reallaşdırılması mexanizmlərinin hazırlanmasına dair təkliflər layihəsidir. İndiyə qədər Birlik çərçivəsində bu qəbildən altı sənəd qəbul edilib. Bunlar əməkçi miqrantların və onların ailə üzvlərinin hüquqi statusu haqqında və MDB iştirakçıları olan dövlətlərin sərhədyanı əməkdaşlığı haqqında konvensiyalar, miqrasiya orqanlarının rəhbərləri şurasının yaradılması haqqında, habelə əmək miqrasiyası və əməkçi miqrantların sosial müdafiəsi sahəsində əməkdaşlıq haqqında sazişlər, regionlararası və sərhədyanı əməkdaşlıq, habelə ümumi əmək bazarının mərhələlər üzrə formalaşması və işçi qüvvəsinin miqrasiyasının tənzimlənməsi konsepsiyalarıdır.