MDB

Ana səhifə

MDB

BMT Təhlükəsizlik Şurası Gürcüstanın kəşfiyyat təyyarəsinin vurulmasına həsr olunmuş qapalı dinləmələr keçirəcək

22 aprel 2008 08:14 (UTC +04:00)

APA-nın ABŞ bürosunun məlumatına görə, gələn həftəyə təyin olunan dinləmələrin dəqiq vaxtı açıqlanmasa da, tədbirə Gürcüstanın xarici işlər naziri David Bakradzenin qatılacağı gözlənilir. Rusiyanın BMT-dəki səfiri Valeri Çurkin bəyan edib ki, onlar Təhlükəsizlik Şurasının toplantısının keçirilməsinə etiraz etməsələr də, abxaz tərəfinin dinləmələrdə öz mövqeyini müdafiə etməsini vacib sayırlar. Gürcüstanın BMT-dəki səfiri İrakli Alasaniya isə bildirib ki, keçən həftə Rusiya prezidenti Vladimir Putinin separatçı Abxaziya və Cənubi Osetiya rejimləri ilə iqtisadi əməkdaşlığın qurulması barədə qərarı regionda vəziyyəti gərginləşdirib. Bütün bunlar rəsmi Tiflisi öz ayrılmaz əraziləri üzərində kəşfiyyat məlumatları toplamaq məqsədi ilə uçan vasitələrdən istifadə etməyə vadar edib. Lakin Rusiya təyyarəsi Gürcüstan hava məkanına daxil olaraq həmin uçan obyekti məhv edib. Cənab Alasaniya Rusiyanın belə addımlarının təkrar olunmaması üçün BMT-nin Gürcüstan üzrə nümayəndəliyinin münaqişə xəttində əlavə səlahiyyətlərlə təmin edilməsini vacib sayıb.