Ukrayna prezidenti Pyotr Poroşenkoya məxsus “Roshen” şirkətinin Rusiyanın Lipetsk şəhərindəki fabriki fəaliyyətini dayandırır.
APA-nın RBK-ya istinadən verdiyi məlumata görə, şirkət siyasi-iqtisadi səbəblərlə istehsal fəaliyyətini dayandırmaq qərarına gəldiyini açıqlayıb. Müəssisənin tam dayanması və konservasiyası bu ilin aprelində həyata keçiriləcək.
“2013-cü ildən başlayaraq fabrikin istehsalı üç dəfə azalıb. Səbəb “Rospotrebnadzor”un 2013-cü ildə “Roshen”ə məxsus Ukrayna xammalının idxalını qadağan etməsi, Rusiya kütləvi informasiya vasitələrində aparılan fəal antiukrayna təbliğatı və piştaxtalarda “Roshen” istehsalı olan məhsulların yerləşdirilməsinə qoyulan qadağalardır”, - deyə şirkətdən bildirilib.
İstehsalın azalması səbəbindən müəssisədə kütləvi ixtisarlar aparılıb. Qalan 700 işçiyə fabrikin bağlanacağı elan edilib.
Qeyd edək ki, 2015-ci ilin aprelində Rusiyada Lipetskdə yerləşən “Roshen” fabrikinə qarşı cinayət işi qaldırılıb. Ukrayna prezidenti Pyotr Poroşenko isə müəssisəni satmaq istədiklərini, lakin buna maneələr yaradıldığını bəyan edib.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
