Mədəniyyət siyasəti

Ana səhifə

Mədəniyyət siyasəti

Mədəniyyət və Turizm Nazirliyi Tiflisdə Nəriman Nərimanovun Ev Muzeyinin sökülməsi faktını təsdiqləyib

23 dekabr 2008 14:57 (UTC +04:00)

Bakı. Ülkər Qasımova-APA. Mədəniyyət və Turizm Nazirliyi Tiflis şəhərində Azərbaycanın görkəmli ictimai-siyasi xadimi Nəriman Nərimanovun Ev Muzeyinin sökülməsi faktını təsdiqləyib. Mədəniyyət və Turizm Nazirliyinin mətbuat katibi İntiqam Hümbətov APA-ya bildirib ki, yenidənqurma işlərinin aparılması məqsədi ilə muzeylə yanaşı onun yerləşdiyi ərazidə bütün bina və yaşayış evləri, obyektlər də sökülüb: “Yenidənqurma işləri Gürcüstanın “Apola” şirkəti tərəfindən həyata keçirilir. Artıq Nəriman Nərimanovun Ev Muzeyinin taleyi ilə bağlı Azərbaycan və Gürcüstan nazirlikləri arasında razılaşma olub. Ümumi razılıqla bağlı isə hazırda sənəd hazırlanır. Sənədin imzalanması və rəsmiləşdirilməsi üçün bizim mütəxəssislər tərəfindən ciddi iş aparılır”.
İ. Hümbətov deyib ki, sənədə əsasən Gürcüstan Mədəniyyət Nazirliyi və Tiflis şəhər Meriyası Nəriman Nərimanovun sökülən Ev Muzeyinin yenidən bərpa olunacağına zəmanət verib. Muzeyin ərazisi əvvəl 130 kvadrat metr olub, bərpadan sonra isə 200 kvadratmetrlik ərazi istifadəyə veriləcək: “Ancaq biz dövlət qurumu olaraq sökülən muzeyin Azərbaycanın Mədəniyyət və Turizm Nazirliyinin mülkiyyəti olduğunu nəzərə alaraq Gürcüstan hökumətindən belə bir zəmanət istədik. Onlar buna problemsiz razılıq verdilər. Gürcüstanın Mədəniyyət Nazirliyi və Tiflis şəhər Meriyası da zəmanət verirlər ki, “Apola” şirkətinin işçiləri onların da nəzarətində olacaq və iki il müddətində yeni muzey Azərbaycan və Turizm Nazirliyinin balansına veriləcək”.
İ. Hümbətovun sözlərinə görə, həmin müddətdə Nəriman Nərimanovun Ev Muzeyinin eksponatları digər bir muzeyin filialında mühafizə olunacaq: “Bu məsələ Azərbaycan hökumətinin diqqətindədir. Mədəniyyət və turizm naziri cənab Əbülfəs Qarayev bu məsələni Azərbaycanda səfərdə olan Gürcüstanın xarici işlər naziri ilə də müzakirə etdi. Gürcüstan hökuməti rəsmi sənəddə bu işin müsbət sonluqla yekunlaşacağına zəmanət verir”.

Mətbuat katibinin sözlərinə görə, məsələ ilə bağlı Gürcüstana gedən Mədəniyyət və Turizm Nazirliyinin nümayəndə heyəti dünən Bakıya qayıdıblar.

Gürcüstan Azərbaycanlıları Konqresinin sədri Əli Babayev isə APA-ya açıqlamasında N. Nərimanovun Ev Muzeyinin 10 gün əvvəl uçurulduğunu deyib: “Mirzə Şəfi Vazeh küçəsində bir ərəb-investor böyük sahəni alıb, bütün qədim evləri, o cümlədən Nəriman Nərimanovun ev muzeyini, bizim tarixi binamızı uçurublar. Həmin ərazidə müasir yaşayış kompleksi tikəcəklər. Məlumata görə, Gürcüstan tərəfi Azərbaycanın mədəniyyət və turizm nazirliyi ilə muzeyin olduğu kimi tikiləcəyi barədə müqavilə imzalayıb. Amma mən buna inanmıram”.

Ə. Babayevin sözlərinə görə, N. Nərimanovun Ev Muzeyinin eksponatları Mirzə Fətəli Axundov adına Mədəniyyət Muzeyinə köçürülüb: “O binanı da “SOCAR Gorgiya” alıb, təmir edəcəyini bildirib”.