Mədəniyyət siyasəti

Ana səhifə

Mədəniyyət siyasəti

Azərbaycan millət vəkilləri Tiflisdə Azərbaycan Dövlət Dram Teatrına baş çəkiblər

19 yanvar 2009 08:28 (UTC +04:00)

Gürcüstan. Nizami Məmmədzadə-APA. Azərbaycanın Milli Məclisinin üzvləri Qənirə Paşayeva və Həvva Məmmədova Gürcüstana səfərləri çərçivəsində Tiflisdə Azərbaycan Dövlət Dram Teatrında olublar. APA-nın yerli bürosunun xəbərinə görə, teatrın rəhbəri Qoça Kapanadze Azərbaycanın millət vəkillərinə teatr binasının təmiri barədə məlumat verib, problemlərdən danışıb, onlardan teatrın fəaliyyətinə dəstək verməyi xahiş edib.
Q. Kapanadze APA-ya bildirib ki, teatrda 30 azərbaycanlı, 15 gürcü çalışır, onlardan 16 nəfəri aktyor heyətidir: “Teatrın binası çox böyük sahəni əhatə edir, lakin vaxtilə bu sahə 16 ailə tərəfindən zəbt olunub. Teatra aid olan evlərdə gürcülər, ermənilər, yunanlar və azərbaycanlılar yaşayırlar. Biz teatrın təmirinə başlayanda onların da razılığını almışıq. Gələcəkdə onları başqa yerlərə köçürmək fikrindəyik. Təmiri öz gücümüzlə aparırıq. Aprelin axırlarında teatrın çardağının və yan divarlarının restavrasiyası başa çatacaq. Gürcüstan Mədəniyyət Nazirliyi bizə büdcə ayırır, amma başqa maddi dəstək verilmir”.
Q. Kapanadze onu da deyib ki, Gürcüstan prezidenti Mixail Saakaşvilinin fərmanı ilə teatra Heydər Əliyevin adı verilib.
Millət vəkili Qənirə Paşayeva APA-nın əməkdaşına açıqlamasında teatrın çoxlu problemlərinin olduğunu deyib: “Azərbaycanlılar teatrlarının inkişafı və fəallaşması üçün dəstək istəyirlər. Azərbaycanın imkanlı insanları teatrı bərpa edə, onun fəaliyyətinə yardımçı ola bilərlər. Biz bu problemləri Azərbaycanın Mədəniyyət və Turizm Nazirliyinə çatdıracağıq. Düşünürəm ki, yaxın zamanlarda bu dəstək göstəriləcək və biz burada tamamilə başqa teatr görəcəyik”.