Mədəniyyət siyasəti

Ana səhifə

Mədəniyyət siyasəti

Araş: ““Always” mahnısını məhz Aysel üçün yazmışam”

06 fevral 2009 09:34 (UTC +04:00)

İctimai Televiziya və Radio Yayımları Şirkətindən (İTV) APA-ya verilən məlumata görə, 2009-cu ilin mayında Moskvada Azərbaycanı “Always” mahnısı təmsil edəcək. Araş müsabiqənin yekunları ilə bağlı açıqlamasında mahnısının uğur qazanacağına inandığını bildirib: “Azərbaycanın mahnı seçimi elan etməsi barədə internetdə oxudum. Cəmi bir gecə ərzində çoxdan üzərində işlədiyim mahnını tamamladım. Çatışmayan bircə şey var idi - bu mahnının kimin üçün yazıldığını anlamırdım. Ayselin şəkillərini görən kimi, hər şeyi anladım! Odur ki, “Always” mahnısını məhz Aysel üçün yazmışam. Müsabiqədə niyə iştirak etdim? Mən əslim Azərbaycandan olduğuna görə, bu ölkənin “Eurovision” tarixinə daxil olması prosesində iştirak etmək istədim. Heyf ki, Azərbaycanın adından çıxış edəcək namizədin seçim turlarını əldən qaçırmışam. Axı mən tək müəllif və bəstəkar deyil, həm də müğənniyəm. Çox istərdim ki, “Eurovision” müsabiqəsinin səhnəsində olum, pərdə arxasında yox”.

Xatırladaq ki, Araş Avropanın məşhur ifaçısı və bəstəkarı olaraq “Pure love”, “Donya” və “Boro boro” kimi hitlərin müəllifidir.

Qeyd edək ki, İTV-nin elan etdiyi mahnı müsabiqəsinə yerli və xarici bəstəkarların təqribən 30-a yaxın mahnısı təqdim olunub. Mahnının seçilmə prosesi çox gərgin keçib. Münsiflərin sözlərinə görə, müsabiqəyə çoxlu sayda dəyərli kompozisiya təqdim olunub. Qalib mahnıya gəldikdə, Azərbaycan mədəniyyəti və ictimaiyyətinin nümayəndələri İsmayıl Ömərov, Fərhad Bədəlbəyli, Murad Adıgözəlzadə, Lalə Kazımova və digərlərinin daxil olduğu 7 nəfərdən ibarət münsiflər heyəti “Always” mahnısına üstünlük verib. Münsiflər heyətinin üzvü Murad Adıgözəlzadə bildirib ki, Azərbaycanı “Eurovision” səhnəsində təmsil edəcək Aysel üçün ən yaxşı mahnını məhz Araş təqdim edib: ““Always” əsl biz axtardığımız mahnıdır. Bu, 100 faiz “Eurovision” hitidir və fikrimizcə, Ayselə tam uyğundur. Əminik ki, bu maraqlı kompozisiya Avropanın hitinə çevriləcək. Mahnı seçimindən tam razıyıq, indi isə parlaq və keyfiyyətli şou düzənləməyin zamanıdır”.

Azərbaycanı “Eurovision 2009” mahnı müsabiqəsində təmsil edəcək 19 yaşlı müğənni Aysel Teymurzadə də artıq ifa edəcəyi mahnı ilə bağlı fikirlərini bildirib: “Sözün düzü, Araşın müsabiqəyə mahnı təqdim etdiyini eşidəndə təəccübləndim. Əlbəttə ki, mahnını artıq dinləmişəm, amma hələ qiymət verməyə tələsmirəm. Mən mütləq mahnının finalda nə cür səslənəcəyini anlamalıyam. Odur ki, səsyazma prosesini və mahnının son versiyasını gözləyirəm”.

“Eurovision_2009”