Mədəniyyət siyasəti

Ana səhifə

Mədəniyyət siyasəti

Azərbaycanda keçiriləcək “Eurovision 2009” Rəqs müsabiqəsinin aparıcısı dünya şöhrətli ulduz olacaq

10 fevral 2009 13:00 (UTC +04:00)

Gənclər və İdman Nnazirliyindən (GİN) APA-ya verilən məlumata görə, müsabiqənin təşəbbüskarı olan Avropa Yayım Birliyi xəbəri fevral ayının əvvəlində rəsmən təsdiq edib. Tədbirin dəqiq vaxtı isə fevralın sonunda elan ediləcək. Yarışın keçirilməsi üçün nəzərdə tutulan Heydər Əliyev adına İdman Konsert Kompleksi 7800 nəfərlik tamaşaçı auditoriyasına malikdir.

“Eurovision 2009” Rəqs müsabiqəsinin Azərbaycanda keçirilməsinə münasibət bildirən gənclər və idman naziri Azad Rəhimov bu cür nüfuzlu müsabiqənin ölkəmizdə keçirilməsinə şad olduğunu deyib: “Bizim üçün “Eurovision 2009” Rəqs müsabiqəsinin ölkəmizdə keçirilməsi böyük şərəfdir. Gənclər və İdman Nazirliyi olaraq, Avropa Yayım Birliyi ilə müsabiqənin təşkilati məsələlərinə məsul olan İctimai Televiziyaya lazımi dəstəyi göstərəcəyik. Yarışın tamamilə yeni, nüfuzlu səviyyədə keçirilməsi üçün biz əlimizdən gələni edəcəyik“.

İctimai Televiziya və Radio Verilişləri (İTV) şirkətinin sədri İsmayıl Ömərov isə Avropa Yayım Birliyinə Azərbaycana göstərdiyi etimadına görə təşəkkürümü bildirib: “Öz tərəfimdən əmin etmək istəyirəm ki, biz nəinki yarış iştirakçıları, eyni zamanda milyonlarla Avropa izləyicisi üçün yarışı unudulmaz edəcəyik“. Qeyd edək ki, Azərbaycan İdman Rəqsləri Federasiyası müsabiqənin keçirilməsində İTV və Gənclər və İdman Nazirliyi ilə əməkdaşlıq edəcək. Federasiyasının prezidenti Murad Rəhimov bildirib ki, hələ ötən ilin dekabr ayında, Cenevrə şəhərində layihənin təqdimatı ərəfəsində Avropa Yayım Birliyi konstruktiv və dəqiq mövqe nümayiş etdirib: “Mən əminəm ki, bu əməkdaşlıq bəhrəsini verməklə bərabər, mükəmməl şouya çevriləcək”.

“Eurovision 2009” rəqs müsabiqəsinin təşkilati məsələlərində Azərbaycana “Euromedia & Luxen” şirkətlər qrupu dəstək verəcək. Şirkətlər qrupunun fəaliyyətinə 2005-ci ildə Ukraynanın Kiyev şəhərində keçirilən “Eurovision” müsabiqəsinin, eyni zamanda 2004-cü ildə müsabiqənin qalibi olmuş Ruslananın Avropa turnesi üçün konsertlərinin təşkili, 2008-ci ildə “Eurovision” və “Eurovision” Rəqs müsabiqəsinə ilk dəfə qatılmış Azərbaycana dəstək kimi məsələlər daxildir. Şirkət Avropa Yayım Birliyinin Balkan ölkələri, Mərkəzi-Şərqi Avropa ölkələri və MDB üzrə tərəfdaşı sayılır.

Qeyd edək ki, “Eurovision 2009” Rəqs müsabiqəsində bir sıra yeniliklər də olacaq. Təşkilatçılar iştirakçı dövlətlərin sayının artmasını “”Eurovision 2009” Rəqs müsabiqəsinin ən mühüm öhdəliklərdən sayırlar. Müsabiqənin aparıcısı dünya şöhrətli ulduz olacaq. Müsabiqədə dünya səviyyəsində məşhur olan ulduzun aparıcı qismində iştirakı nəzərdə tutulub. İTV tərəfindən danışıqlarının aparılması nəzərdə tutulan ulduzun adı hələlik açıqlanmır.

Təşkilatçılar artıq əlavə olaraq yüksək şəkildə Avropa kanallarına canlı ötürüləcək şounu reallaşdırmağı planlaşdırırlar. Bu televiziya məhsulu “Eurovision 2009”-u yayımlayan bütün Avropa Yayım Birliyinin üzvləri üçün mümkün olacaq.