Mədəniyyət siyasəti

Ana səhifə

Mədəniyyət siyasəti

Azərbaycanda keçiriləcək I Beynəlxalq Muğam Festivalı çərçivəsində üç günlük Beynəlxalq Muğam Simpoziumu təşkil olunacaq

10 mart 2009 16:49 (UTC +04:00)

Bakı. Ülkər Qasımova-APA. Bu ilin 18-25 mart tarixlərində Azərbaycanda ilk dəfə keçiriləcək I Beynəlxalq Muğam Festivalı çərçivəsində Beynəlxalq Muğam Simpoziumu da keçiriləcək. APA-nın məluamtına görə, bunu mədəniyyət və turizm naziri Əbülfəs Qarayev jurnalistlərlə görüşündə deyib. Nazir bildirib ki, üç günlük simpoziumda dünyanın tanınmış alimləri və musiqişünasları da təmsil olunacaq: “Onların bütün işləri müxtəlif dillərdə nəşr olunacaq. Simpoziumda üç gün müddətində elmi əsaslarla muğamın mövcud vəziyyətinin, onun gələcək yollarının, istiqamətinin müəyyənləşdirilməsi yolunda addımlar atılacaq”.

Ə. Qarayevin bildirdiyinə görə, I Beynəlxalq Muğam Festivalı çərçivəsində ümumilikdə üç böyük tədbir keçiriləcək. Festival üç günlük simpoziumla başlaycaq, daha sonra isə festival çərçivəsində Beynəlxalq Muğam Müsabiqəsi keçiriləcək: “Bu gün Muğam Müsabiqəsinin yekun konserti təşkil olunacaq. Ən yaxşı nəticəni göstərmiş ifaçı Beynəlxalq Muğam Festivalı çərçivəsində keçiriləcək Beynəlxalq Muğam Müsabiqəsində təmsil olunmaq imkanı qazanacaq. Artıq 12 ölkənin nümayəndələri bu müsabiqədə iştirakını təsdiqləyib və biz hazırda həmin ölkələrin cədvəlini tuturuq”.

Nazir bildirib ki, Beynəlxalq Muğam Festivalında 35 yaşına qədər incəsənət xadimləri, muğam ifaçıları, müğənnilər iştirak edə biləcəklər: “Çox yüksək səviyyəli mükafatlar təqdim olunacaq. Bu festivalda həm UNESCO, həm də İSESCO-nun, eyni zamanda dünyada xalq yaradıcılığı ilə məşğul olan dairələrin ən tanınmış alimləri, ziyalıları iştirak edəcək. Bu tədbirlərə UNESCO-nun Qeyri Maddi-Mədəni İrs Komissiyasının bütün üzvləri gələcək. Onların burada olması bizim üçün çox önəmlidir. Martın 20-də bütün qonaqların respublika rəhbərliyinin iştirakı ilə paytaxtda keçiriləcək şənliklərdə iştirakını təşkil edəcəyik”. Ə. Qarayev bildirib ki, bu müddət ərzində Novruz bayramının UNESCO-nun Mədəni İrs Siyahısına salınması üçün təqdimatı keçiriləcək: “Bununla yanaşı artıq bu siyahıya salınması üçün təqdim olunmuş aşıq musiqisi və Azərbaycan xalçalarının da təqdimatını daha geniş şəkildə həyata keçirəcəyik”.

Mədəniyyət və turizm nazirinin sözlərinə görə, artıq I Beynəlxalq Muğam Festivalı ilə bağlı ciddi hazırlıq işlərinə startı verilib: “Artıq bir neçə aydır biz bu festivala hazırlıq görürük. İlk dəfə olaraq eyni müddətdə festival adı altında üç böyük tədbir keçiriləcək. Onların hərəsi ayrılıqda götürsək, böyük bir hadisədir. Biz bunun hamısını birləşdirib eyni vaxtda keçirməyi qərarlaşdırdıq. Muğam Festivalının açılışı Beynəlxalq Muğam Mərkəzində həyata keçiriləcək. Festival çərçivəsində gün ərzində iki konsert olacaq. Festival müddətində Azərbaycan Dövlət Akademik Opera və Balet Teatrında, Azərbaycan Dövlət Filarmoniyasında, Musiqi Komediya Teatrında muğamla əlaqədar olaraq tamaşalar göstəriləcək. Martın 18-dən 25-dək respublikanın bütün mədəniyyət müəssisələrində muğam aləmini təqdim edəcəyik. Bu dəfə biz artıq geniş ictimaiyyətin bu konsertlərə daxil olmasına imkan yaradacağıq. Belə ki, festivalın hər konserti üçün biletləri satışa çıxaracağıq. Bu biletlərin satışı bütün teatrların kassalarında və şəhərin bilet satışı mərkəzlərində həyata keçiriləcək”. Mədəniyyət və turizm naziri çıxışında deyib ki, festivalda 150-200 nəfər arasında tanınmış musiqiçi, alim, müxtəlif beynəlxalq qurumların nümayəndələrinin iştirakı gözlənilir.