Mədəniyyət siyasəti

Ana səhifə

Mədəniyyət siyasəti

Sofiyada Avropa Şurasının Mədəniyyət üzrə Rəhbər Komitəsi bürosunun fövqəladə iclası keçirilir

10 mart 2009 17:05 (UTC +04:00)

Bakı. Ülkər Qasımova - APA. Bolqarıstanın Sofiya şəhərində Avropa Şurasının (AŞ) Mədəniyyət üzrə Rəhbər Komitəsi bürosunun fövqəladə iclası keçirilir. Mədəniyyət və Turizm Nazirliyinin mətbuat xidmətindən APA-ya verilən məlumata görə, martın 9-dan başlanan və martın 11-dək davam edəcək iclasda AŞ-nin Mədəniyyət, Mədəni və Təbii İrs üzrə direktoru Rober Palmer, AŞ Mədəniyyət üzrə Rəhbər Komitəsinin sədri D. Danailova və büro üzvləri, Azərbaycan tərəfdən isə mədəniyyət və turizm nazirinin müavini, büro üzvü Sevda Məmmədəliyeva və nazirliyin beynəlxalq əlaqələr və mədəniyyət proqramları şöbəsinin beynəlxalq təşkilatlarla əməkdaşlıq və proqramlar sektorunun məsləhətçisi Vasif Eyvazzadə iştirak edir.

İclasda 2008-ci ilin dekabrın 2-3-də Bakıda keçirilmiş AŞ-yə üzv dövlətlərin Mədəniyyət Nazirlərinin Konfransının nəticələri, konfransa dair hesabat və qəbul olunan “Mədəniyyətlərarası dialoqa dair Bakı Bəyannaməsi”ndən irəli gələn məsələlərin həyata keçirilməsi, “Sənətçilər dialoq naminə” layihəsi, AŞ-nin mədəniyyət və mədəni irs sahələrində 2009-cu il üçün fəaliyyət planı, mədəniyyət layihələrinin 2009-cu il büdcəsi, AŞ mədəniyyətləarası dialoq layihələri çərçivəsində mədəniyyətlərarası dialoq şəhərləri layihəsi, həmçinin cari ilin 5-6 iyun tarixlərində Polşanın Krakov şəhərində keçiriləcək “Kommunizmdən 20 il sonra Mədəniyyət və Avropada inkişaf” mövzusunda konfransa dair müzakirələr aparılacaq.

İclasda xüsusilə Bakı konfransının nəticələrinə dair təkliflər irəli sürüləcək və 2009-cu ilin oktyabrında Bakıda keçirilməsi planlaşdırılan İslam ölkələri mədəniyyət nazirlərinin konfransına dəvət ediləcək Avropa dövlətlərinin müəyyənləşdirilməsinə dair fikir mübadiləsinin aparılması da nəzərdə tutulur. Azərbaycan tərəfi ilk dəvə olaraq Bakıda keçirilən AŞ-yə üzv dövlətlərinin mədəniyyət nazirlərinin konfransına İSESCO-ya üzv olan 10 dövləti dəvət edib və həmin konfransda təklif edilib ki, İslam ölkələrinin mədəniyyət nazirlərinin konfransına 10 Avropa dövləti Azərbaycan tərəfindən dəvət ediləcək.

Səfər çərçivəsində R. Palmer və AŞ katibliyinin nümayəndələri ilə görüş keçirilib, Bakı konfransının nəticələrinə dair Azərbaycan tərəfinin ilkin təkliflərini qarşı tərəfə təqdim edilib. Təqdim olunan təkliflərlə bağlı Büronun iclasında müzakirələr aparılacaq.