Mədəniyyət siyasəti

Ana səhifə

Mədəniyyət siyasəti

Tiflisdə Aşıq Əmrah Gülməmmədovun 100 illik yubileyi qeyd olunub

11 mart 2009 07:32 (UTC +04:00)

Tiflis. Nizami Məmmədzadə-APA. Dünən Tiflisin Rustaveli teatrında Borçalının görkəmli ustad sənətkarı Aşıq Əmrah Gülməmmədovun 100 illik yubiley tədbiri keçirilib.
APA-nın Gürcüstan bürosunun xəbərinə görə, tədbiri Marneuli rayon İcra Hakimiyyəti başçısının müavini Hüseyn Yüsifov açıb. Tədbirdə Tiflisdə fəaliyyət göstərən Gənclər Təşəbbüs Qrupunun hazırladığı “Aşıq Əmrahın həyat və yaradıcılığı” barədə film nümayiş etdirilib. Filmdən sonra Kvemo-Kartli bölgə qubernatoru David Kirkitadze, Azərbaycan Milli Məclisinin üzvləri Gültəkin Hacıbəyli, Musa Quliyev, Azərbaycan-Gürcüstan Parlamentlərarası Dostluq Qrupunun rəhbəri Qənirə Paşayeva, Azərbaycan Aşıqlar Birliyinin sədri, xalq şairi Zəlimxan Yaqub, Aşıq Ziyəddin Keşəli, Aşıq Avdı, Aşıq Həvəskar, SOCAR neft şirkətinin meneceri Arif Əliyev və başqaları çıxış edərək Aşıq Əmrah sənətkarlığından danışıblar.
Q. Paşayeva yubileyi təşkil etdiklərinə görə Kvemo-Kartli qubernatoruna və Marneuli rayon rəhbərliyinə hədiyyələr təqdim edib.
Yubiley tədbirində Azərbaycanın Gürcüstandakı səfiri Namiq Əliyev, səfirliyin əməkdaşları, Gürcüstan prezidentinin milli azlıqlar üzrə müşavirləri Mübariz Qarayev, Tamar Kintsuraşvili, TİKA-nın Gürcüstan bürosunun rəhbəri Aytəkin Ayden, Gürcüstanın reinteqrasiya nazirinin müşaviri Savalan Mirzəyev, Azərbaycandan gələn qonaqlar, Gürcüstan parlamentinin azərbaycanlı deputatları, Marneuli, Dmanisi, Bolnisi, Qardabani, Rustavi, Kaspi, Msxeta, Zalqa rayonlarından gəlmiş azərbaycanlı ziyalılar, görkəmli aşığın ailə üzvləri də iştirak ediblər.