Mədəniyyət siyasəti

Ana səhifə

Mədəniyyət siyasəti

Əbülfəs Qarayev: “Bu il Azərbaycana gələcək turistlərin sayında 10-12 faizlik artım proqnozlaşdırılır”

12 mart 2009 09:51 (UTC +04:00)

Bakı. Ülkər Qasımova - APA. Azərbaycanın müxtəlif regionlarında 11 Turizm İnformasiya Mərkəzi yaradılıb. APA-nın məlumatına görə, bunu mədəniyyət və turizm naziri Əbülfəs Qarayev jurnalistlərə açıqlamasında deyib. Nazirin sözlərinə görə, bu mərkəzlərin yaradılmasında əsas məqsəd turistlərin ölkəmizə səfərini yüksək səviyyədə təşkil etməkdir: “Həmin informasiya mərkəzlərinin yaradıldığı regionlar haqqında müxtəlif bələdçi kitabları hazırlanıb. İnformasiya mərkəzlərinin əsas işi turizm rəhbərlərinin təkmilləşdirmə kurslarını təşkil etməkdir. Bu gün artıq informasiya texnologiyalarından istifadə olmadan turizm sahəsini inkişaf etdirmək qeyri-mümkündür. Otellərin vəhdət şəbəkə vasitəsilə dünya məkanlarına daxil edilməsi və xarici nümayəndələrin tanış olması güclü vasitədir. Biz bunu çox düşünürdük və çox sevindiricidir ki, artıq bu layihə gerçəkləşib. Hətta bunun müxtəlif formaları mövcuddur. Biz müşahidə edirik ki, oraya daxil olanların sayı ildən-ilə artır”.

Əbülfəs Qarayev açıqlamasında ötən il üçün Azərbaycana gələn turistlərin sayında 40 faiz artım olduğunu da qeyd edib: “Belə bir göstərici dünyanın heç bir ölkəsində yoxdur. Sözsüz ki, bu nəticəni çox sevinclə qarşıladıq. Turistlərin sayında artımın olması isə bilavasitə Azərbaycanda keçirilən çoxsaylı beynəlxalq tədbirlərlə bağlıdır. Ötən il Azərbaycana 1 milyon 899 min əcnəbi gəlib. Bu çox böyük müvəffəqiyyətdir. İnanıram ki, 2009-cu ilin Bakının İslam Mədəniyyətinin Paytaxtı elan edildiyinə görə bu say azalmayacaq, əksinə artacaq. Bu artım təxminən 10-12 faiz olacaq. Reallıq öz sözünü deyəcək”. Mədəniyyət və turizm naziri dünyada gedən iqtisadi böhranın Azərbaycanın turizm sahəsinin inkişafına heç bir mənfi təsir göstərmədiyini vurğulayıb: “Maliyyə böhranı ilə əlaqədar biz heç bir turizm şirkətləri ilə layihələri ixtisar etməmişik. Əlbəttə ki, otellərdə qiymətlərin aşağı düşməsi müsbət haldır. Çox zaman otellərdə qiymətlərin yüksək olması ilə bağlı şikayətlər daxil olur. Mən isə bu şikayətlərə cavab vermişdim ki, bazar hər şeydə özünü tənzimləyəcək, rəqabət artacaq. Qiymətlərin aşağı düşməsi ilə gələn insanların sayı da çoxalacaq”.