Mədəniyyət siyasəti

Ana səhifə

Mədəniyyət siyasəti

Prezident İlham Əliyev AMEA-nın Nizami Gəncəvi adına Ədəbiyyat Muzeyində aparılmış əsaslı təmir və yenidənqurma işləri ilə tanış olub

14 mart 2009 18:45 (UTC +04:00)

Bakı-APA. Bu gün prezident İlham Əliyev Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat Muzeyində aparılmış əsaslı təmir və yenidənqurma işləri ilə tanış olub. APA-nın xəbərinə görə, prezident Heydər Əliyevin Azərbaycan mədəniyyətinə, o cümlədən ədəbiyyatına diqqət və qayğısını əks etdirən fotoguşəyə baxıb.
Daha sonra dövlət başçısı Yaxın və Orta Şərqdə, eləcə də Avropada yeganə ədəbiyyat muzeyi olan bu mədəniyyət ocağının böyük konfrans salonunu, “Qədim dövr”, “Dədə Qorqud”, “Nizami Gəncəvi”, “Məhsəti Gəncəvi”, “Xaqani Şirvani”, “İmadəddin Nəsimi”, “Məhəmməd Füzuli”, “Şah İsmayıl Xətai” salonlarını gəzib. Prezident əsaslı təmirdən sonra muzeylə yaxından tanış olub və yeniliklər barədə məlumat alıb.

Qeyd edək ki, 2004-cü ilin sonunda prezident İlham Əliyevin muzeyə gəlişindən sonra onun tapşırığına əsasən hazırlanan layihələr əsasında burada əsaslı yenidənqurma və təmir-bərpa işləri başlanıb. Təmir zamanı uçmaq təhlükəsi olan binanın təməli və bütün divarları möhkəmləndirilib. Bütün naxış, bəzək və mürəkkəb yapma elementləri təzədən hazırlanıb, yenidənqurmadan əvvəl 800 kvadratmetr olan ekspozisiya sahəsi 2500 kvadratmetrə çatdırılıb. Hazırda ekspozisiya 30 əsas və 10 köməkçi salonda yerləşir. Müxtəlif tədbirlərin keçirilməsi üçün 270 və 75 yerlik iki salon əsaslı şəkildə yenidən qurularaq, lazımi avadanlıqla təchiz edilib.