Mədəniyyət siyasəti

Ana səhifə

Mədəniyyət siyasəti

Vasumati Badrinatan: “Muğam festivalın keçirilməsi Azərbaycanın musiqi irsini nümayiş etdirmək baxımından çox əhəmiyyətlidir”

29 mart 2009 10:11 (UTC +04:00)

Bakı. Laçın Sultanova-APA. Bakıda keçirilmiş “Muğam Aləmi” I Beynəlxalq Muğam Festivalının iştirakçısı, Hindistan karnatik musiqisinin ifaçısı, doktor Vasumati Badrinatanın APA-ya müsahibəsi

- Karnatik musiqi nədir?

- Mən Hindistanın klassik musiqi ifaçısıyam. Hindistanda klassik musiqinin iki cərəyanı var – Cənubda karnatik klassik musiqisi, Şimalda xindustani musiqisi. Mən karnatik musiqi ifa edirəm. Hindistan musiqisi olduqca qədim musiqidir. Bizdə təqdimatdan asılı olan musiqilər olur, musiqimizi təqdim etdiyimiz zaman improvizasiyaya böyük yer ayırırıq. Musiqimiz Hindistanın həm müqəddəs, həm də fəlsəfi musiqisi hesab olunur.

- Muğam festivalı necə keçdi, sizin çıxışınız necə qarşılandı?

- Festival olduqca gözəl keçdi. Muğam Mərkəzi çox gözəl inşa edilib, mənim çox xoşuma gəldi. Düşünürəm ki, belə bir festivalın keçirilməsi Azərbaycanın musiqi irsini göstərmək üçün çox əhəmiyyətlidir. Bu festivalda iştirak etdiyimə çox şadam və Hindistan karnatik musiqisinin ilk ifaçısı kimi Azərbaycana gəlməyimə çox sevinirəm. Mənim çıxışım çox yaxşı qarşılandı, bunun da iki səbəbi var. Birincisi odur ki, festivalda tək Azərbaycandan yox, bir neçə ölkədən sənətkarlar iştirak edirdi, festival auditoriyası üçün çıxış etmək mənim üçün çox xoş idi, konsertdən sonra mənə yaxınlaşıb ifamı bəyəndiklərini söyləyənlər oldu.

- Bakıya gəlməmişdən öncə Azərbaycan muğamı barədə məlumatınız var idi?

- Bəli, gəlməmişdən əvvəl Azərbaycan muğamına qulaq asmışam, məncə bu muğamın çox gözəl bir formasıdır. Alim Qasımov və qızının çıxışlarını və digər muğam ustalarının çıxışını dinləmişəm. Mənim xoşuma gələn odur ki, Hindistanın karnatik musiqisi kimi, Azərbaycan muğamında da improvizasiya üçün çox imkanlar var, muğamın dərinliyi mənim xoşuma gəlir. Mən Azərbaycan muğamında hisslərin, emosiyaların necə tərənnüm olmasını izlədim, bu mənim çox xoşuma gəldi.

- Azərbaycan sənətkarları ilə birgə çıxış etmək istərdinizmi?

- Artıq biz belə bir məşq keçirmişik. Tanınmış Azərbaycan caz pianoçusu Salman Qəmbərov və əslən İraqdan olan hazırda Nyu-Yorkda yaşayan muğam ifaçısı ilə məşq keçirdik. Çox maraqlı alındı, Caz Mərkəzində proqramla çıxış etdik. Mən Azərbaycan muğamı ilə karnatik musiqi arasında bənzərlikləri tapmağa çalışıram.

- Azərbaycan və azərbaycanlılar haqqında hansı fikirdəsiniz?

- Azərbaycana ilk dəfədir ki səfər edirəm. Bakı çox gözəl şəhərdir. Azərbaycanlıları həm dostluğuna, həm qonaqpərvərliyinə, yoldaşlığına görə çox bəyəndim, Hindistanda bu keyfiyyətlər çox yüksək qiymətləndirilir. Ona görə də burada olmaq mənim üçün xoşdur. Özümlə Azərbaycan sənətkarlarının bir neçə diskini aparıram. Əvvəlcədən ifasını dinlədiyim Alim və Fərqanə Qasımovları canlı görməyimə çox şad oldum.