Mədəniyyət siyasəti

Ana səhifə

Mədəniyyət siyasəti

Tanınmış gürcü şairinin Azərbaycan dilində kitabı nəşr olunub

29 mart 2009 16:20 (UTC +04:00)

Bakı. Laçın Sultanova-APA. Bu gün Bakıda tanınmış gürcü şairi Şota İataşvilinin «Veriya bağçasındakı kafe» adlı kitabının təqdimatı keçirilib. APA-nın məlumatına görə, təqdimat «Azərbaycanda gürcü kitabları günləri» çərçivəsində baş tutub. “Pen-GUAM” təşkilatının icraçı katibi, şair Səlim Babullaoğlu bildirib ki, «Azərbaycanda gürcü kitabları günləri» Azərbaycan-Gürcüstan Parlamentlərarası Dostluq Qrupu və “Pen-GUAM” təşkilatının birgə layihəsidir.

Tədbirdə çıxış edən Azərbaycan-Gürcüstan Parlamentlərarası Dostluq Qrupunun rəhbəri, millət vəkili Qənirə Paşayeva Azərbaycan-Gürcüstan ədəbi və mədəni əlaqələrinin inkişafının çox vacib olduğunu vurğulayıb: “Sovet dövründə Azərbaycan və gürcü xalqları bir-birinin ədəbiyyatı ilə rus dili vasitəsi ilə tanış olurdu. İndi isə orijinaldan ana dilimizə gürcü yazarlarının, gürcü dilinə isə Azərbaycan yazarlarının əsərlərinin tərcümə edilib çap olunması çox gözəl haldır”. Deputat Azərbaycanın tarixi gerçəklikləri barədə gürcü dilində nəşrlərin çap olunmasının vacibliyini də diqqətə çatdırıb.

Kitabın müəllifi Şota İataşvili isə Gürcüstan və Azərbaycan arasında mədəni əlaqələrin tarixi kökləri olduğunu, son 5 ildə bu əlaqələrin yeni inkişaf mərhələsinə keçdiyini söyləyib. O, şeirlərinin ilk dəfədir ki, xarici dildə nəşr olunmasından məmnunluğunu ifadə edib.

«Ulduz» jurnalının baş redaktoru Elçin Hüseynbəyli Ş. İataşvilinin çap olunmuş kitabına görə jurnalın 2009-cu il üçün «Poeziya mükafatı» ilə təltif olunduğunu bildirib, şairə diplom və pul mükafatı təqdim edib.

Gürcüstanın Azərbaycandakı səfirliyinin əməkdaşı Eteri Astemirova da gürcü şairinin Azərbaycan dilində kitabının nəşr olunmasını çox böyük hadisə adlandırıb.