Mədəniyyət siyasəti

Ana səhifə

Mədəniyyət siyasəti

“Eurovision TV”-nin baş direktoru: “Azərbaycan dünya səviyyəli ulduzlarla danışıqlar aparır”

14 may 2009 12:46 (UTC +04:00)

Bakı - APA. “Eurovision TV”nin baş direktoru Byorn Eriksen Azərbaycanda keçiriləcək “Eurovision-2009” rəqs müsabiqəsi ilə bağlı Gənclər və İdman Nazirliyinin saytına eksklüziv müsahibə verib.

- Müsabiqənin neçə keçiriləcəyi ilə bağlı konkret məlumatlar verə bilərsiniz?

- Azərbaycandakı həmkarlarımız - yarışın təşkilatçıları sözün əsl mənasında böyük bir şou proqram təşkil etməyi planlaşdırırlar. Mən bu yaxınlarda şounun keçiriləcəyi səhnənin planını görmüşəm. Bu, həqiqətən heyranedici idi. Müsabiqənin keçiriləcəyi səhnənin ölçüləri 63x43 metrdir ki, bu da çox möhtəşəmdir. Belə anlamaq olur ki, tamaşaçıların rahat şəkildə şounu seyr edə bilməsi və bu həyəcanı daha ürəkdən yaşamaları üçün bir neçə hissəli səhnə və böyük səhnə arxası olacaq. Bu səhnə son “Eurovision” rəqs müsabiqəsindəki səhnə standartlarından da yüksəkdir. Səhnədə yaşananlar tamaşaçıya özünü gözəl və həyəcanverici məhəbbət hekayəsində hiss etməyə imkan verəcək. 2009-cu il rəqs müsabiqəsində açıq hava şousu da gözlənilir. Bu şou sentyabrın 24-də Bakıda keçiriləcək və bütün iştirakçı ölkələrində nümayiş olunacaq.

- Müsabiqə iştirakçılarının siyahısı bəllidirmi?

- İştirakçıların rəsmi siyahısı bu həftə bəlli olacaq. Hazırda isə əlimizdə apreldə keçirilən təqdimat mərasimində iştirak etmiş Avropa İctimai Yayım Şurasının bəzi üzvlərinin təsdiq olunmamış siyahısı var.

- Dünyada baş verən maliyyə böhranı yarışda iştirak etmək arzusuna nə qədər təsir edib?

- Yaxşı sualdır. 2008-ci illə müqayisədə Avropa İctimai Yayım Şurasına üzv olan TV kanallarının öz büdcələrini, eyni zamanda əsas xərclərini müəyyən məbləğdə azaltdıqlarını nəzərə alaraq, biz və Azərbaycan tərəfi iştirak haqqının da azaldılması ilə bağlı bu ölkələri məlumatlandırmışıq. Maliyyə böhranını çox yaxşı anlayan Azərbaycan iştirakçı ölkələr üçün xüsusi güzəştlər təqdim edir. İştirakçı dövlətlərin təqdimat roliklərinin (postkard) hər biri ayrı-ayrılıqda Bakıda hazırlanacaq. Azərbaycan maliyyə böhranı zamanı özünü stabil, mübariz və yaradıcı bir ölkə və tərəfdaş kimi sübüt edib. Azərbaycanlı tərəfdaşlarımız yarışın ən yüksək səviyyədə keçirilməsini, eyni zamanda onun daha çox ölkələrdə nümayiş etdirilməsini təmin etmək məqsədilə uzaq yola çıxmaqdan belə çəkinmirlər.

- Müsabiqənin aparıcısı haqqında nə deyə bilərsiniz?

- Mən bilirəm ki, Azərbaycan tərəfi dünya səviyyəli ulduzlarla danışıqlar aparır. Sürpriz seçim çox maraqlı və gözlənilməzdir. Danışıqlar hələ davam edir. Mən hələ heç kəsin adını deyə bilmərəm. İctimai Yayım Şurası olaraq azərbaycanlı tərəfdaşlarımızla birgə bu yarışı unudulmaz etmək bizim ən başlıca məqsədimizdir.