Mədəniyyət siyasəti

Mədəniyyət siyasəti

Bakıda “Tarixi islam şəhərləri və müasir memarlıq” adlı beynəlxalq konfrans keçirilir

02 iyun 2009 10:10 (UTC +04:00)

Bakı. Ülkər Qasımova-APA. Bu gün Bakıda Muzey Mərkəzində “Tarixi islam şəhərləri və müasir memarlıq” adlı beynəlxalq konfrans öz işinə başlayıb. APA-nın məlumatına görə, konfrans Mədəniyyət və Turizm Nazirliyi və “İslam Konfransı Təşkilatı”nın “İslam Tarixi, İncəsənəti və Mədəniyyəti üzrə Beynəlxalq Tədqiqat Mərkəzi”nin (İRCİCA) təşkilatçılığı ilə keçirilib. Konfransda İRCİCA-nın baş direktoru Halit Eren, Mədəni Sərvətlərin Öyrənilməsi və Tədqiqi üzrə Beynəlxalq Mərkəzin (İCCROM) nümayəndəsi Zəki Aslan, mədəniyyət və turizm naziri Əbülfəs Qarayev və başqaları çıxış ediblər.

Ə. Qarayev çıxışında 2009-cu il ərzində İslam mədəniyyətinin təbliği, inkişafı, İslam mədəni irsinin qorunması məqsədi ilə Bakı şəhərində bir sıra beynəlxalq tədbirlərin keçirilməsinin nəzərdə tutulduğunu qeyd edib: “İslam ölkələrinin tarixi şəhərləri əsrlər boyu yaşayıb, böyüyüb və zamanımıza çatıb. Bu şəhərlər tarixiliyini, özünəməxsusluğunu qoruyub saxlayıb. Sosial, iqtisadi durum ardınca yeni texnologiyalar memarlığı, şəhərsalmanı inkişaf etdirir, bəzi hallarda şəhərlərin formalaşmış strukturunda dəyişikliklər tələb olunur. Şəhərlərin tarixi mühitinə, onların tarixi və memarlıq irsinin mühafizəsinə diqqətlə yanaşılmalıdır. Tarixi şəhərlər yaşayır və yaşamalıdır”. Nazir onu da deyib ki, konfransın məqsədi tarixi islam şəhərlərində memarlıq irsinin, tarixi mühitin qorunması və bununla yanaşı yeni inkişafın, müasir memarlığın və şəhərsalmanın bu mühitə təsirinin araşdırılmasıdır, qeyd edilən sahədə mütəxəssis və ekspertlərin təcrübə mübadiləsidir. Konfransda Azərbaycan, Avstriya, Bosniya və Herseqovina, Türkiyə, Misir, İordaniya, Mərakeş, Özbəkistan, Qazaxıstan, Böyük Britaniya və Litvadan mütəxəssis və ekspertlər iştirak ediblər.