Mədəniyyət siyasəti

Ana səhifə

Mədəniyyət siyasəti

Azərbaycanlı baletmeyster Eldar Əliyev Budapeşt Opera və Balet Teatrında “Jizel” baletini səhnələşdirib

02 may 2011 10:49 (UTC +04:00)

Bakı – APA. Budapeşt Opera və Balet Teatrında məşhur fransız bəstəkarı Adolf Adanın “Jizel” baletinin yeni quruluşda premyerası olub. Azərbaycanın Macarıstandakı səfirliyindən APA-ya verilən məlumata görə, tamaşanı bu ilin əvvəlindən etibarən teatrın bədii rəhbəri vəzifəsində çalışan azərbaycanlı baletmeyster Eldar Əliyev hazırlayıb. “Jizel”in Fransa paytaxtında ilk tamaşasının 170 illiyinə həsr olunan premyera uğurlu keçib. Tamaşada Macarıstanın dövlət və hökumət qurumlarının təmsilçiləri, Budapeştdə akkreditə olunan diplomatik korpusun nümayəndələri iştirak ediblər.

E. Əliyev 1959-cu ildə Bakı şəhərində doğulub. Bakı Xoreoqrafiya Məktəbini bitirib, Azərbaycan Dövlət Opera və Balet Teatrında çalışıb. 1980-1992-ci illərdə Leninqraddakı S. M. Kirov adına Opera və Balet Teatrının solisti olub. 1992-ci ildən ABŞ-da yaşayır. Rəhbərlik etdiyi balet truppası 2005-ci ildə bu ölkədə məşhur Azərbaycan bəstəkarı Fikrət Əmirovun “Min bir gecə” baletini tamaşaya qoyub. Hazırda Macarıstan tərəfinin dəvəti ilə Budapeşt Opera və Balet Teatrının balet üzrə bədii rəhbəri vəzifəsində çalışır.