Mədəniyyət siyasəti

Ana səhifə

Mədəniyyət siyasəti

54-cü Ümumdünya Təsviri İncəsənət Sərgisi - Venesiya Biennalesində Azərbaycan pavilyonu böyük maraq doğurub

03 iyun 2011 16:46 (UTC +04:00)

Bakı-APA. 54-cü Ümumdünya Təsviri İncəsənət Sərgisi – Venesiya Biennalesi çərçivəsində şəhərin ən görkəmli yerlərinin biri olan PALAZZO BENZON sarayında Azərbaycan pavilyonunun açılışı olub. Mədəniyyət və Turizm Nazirliyinin mətbuat xidmətindən APA-ya verilən məlumata görə, açılış mərasimində Azərbaycanın birinci xanımı, millət vəkili, UNESCO və İSESCO-nun xoşməramlı səfiri, Heydər Əliyev Fondunun prezidenti Mehriban xanım Əliyeva, mədəniyyət və turizm naziri Əbülfəs Qarayev, Azərbaycan ictimaiyyətinin digər nümayəndələri iştirak ediblər.
Azərbaycan rəssamlarının əsərləri sərgiyə gələnlərin böyük marağına səbəb olub. Bir çox sənətsevərlər Azərbaycan müasir incəsənətinin çox yüksək səviyyədə olduğunu bildirib, bütövlükdə müasir dünya sənət anlamı ilə yanaşı addımladığını, hətta bəzən irəlidə getdiyini deyiblər. Bu il Venesiya Biennalesinin mövzusu “İLLUMİNATİON”, yəni millətlərin işığı kimi səsləndiyindən Azərbaycan rəssamlarının əsərlərinin motivləri də Azərbaycanı ifadə edərək “Relational, of Baku”, yəni “Bakıya məxsus” reallıqları, emosiyaları, təəssüratları və xatirələri qabartmaq, doğma diyardan nə qədər ayrı olsalar da vətənlə qırılmaz tellərlə bağlı olmasını göstərməkdir. Əsərləri sərgilənən bu rəssamlardan yalnız ikisi - Altay Sadıqzadənin və Mikayıl Əbdürrəhmanov hazırda Azərbaycanda yaşayır. Artıq bir neçə ildir ki, Xanlar Qasımov və Ağa Hüseynovun Amerikada, Zeyqəm Əzizov Böyük Britaniyada, Aydan Salahovanın isə Moskvada yaşamasına baxmayaraq Bakı mövzuları, Şərq həyatı, Şərqlə Qərbin əbədi təması və təzadı onlar üçün müqəddəs mövzular olaraq qalmaqdadır. Altay Sadıqzadə və Mikayıl Əbdürrəhmanov isə öz nəslinin ən müasir rəssamları kimi çıxış edir, klassik rəssamlığın dili ilə çağdaş sənət axarına qoşularaq ən contemporary – yəni ən çağdaş olaraq baxılırlar.
Pavilyonla bağlı jurnalistlərlə fikirlərini bölüşən rəssam Aydan Salahova sərginin çox gözəl keçdiyini, həmkarlarının çox yüksək səviyəli əsərlərlə çıxış etdiklərini söyləyib. Aydan Salahova ölkəmizin birinci xanımının sərgiyə gəlişini yaradıcı insanların istedadına və əməyinə göstərilən ən böyük diqqət və qayğı kimi dəyərləndirib. Aydan Salahova həm də sərgidə müəllifi olduğu iki əsərin Venesiyaya gətirilən zaman zədələndiyindən təəssüflənib və bunun nəticəsində sərgi zamanı bu əsərlərin müvəqqəti olaraq ağ örtüklə bağlandığını deyib. Hal-hazırda bu əsərlər yenidən bərpa olunur və çox qısa zamanda tamaşaçılara təqdim olunacaq.
Hazırda sərginin yalnız ilk 2 günü ərzində Azərbaycan pavilyonunu 5000 nəfərdən artıq tamaşaçı ziyarət edib. Sərgi sentyabrın 30-dək davam edəcək.