Bakı. Nicat Mustafayev – APA-Economics. «Azərbaycanın qiymətli kağızlar bazarı üzrə qanunvericiliyinin Avropa Birliyinin (AB) qanunvericiliyinə uyğunlaşdırılması və Qiymətli Kağızlar üzrə Dövlət Komitəsinin (QKDK) institusional inkişafı» Tvinninq layihəsi ölkədə fəaliyyət göstərən emitentlərə stimul verəcək. «APA-Economics»in məlumatına görə, bu barədə bu gün Bakıda keçirilən sözügedən layihənin təqdimat mərasimində çıxış edən Polşa Maliyyə Nəzarəti Agentliyinin nümayəndəsi xanım İlona Pyeçiynska-Çernı bildirib.
Onun sözlərinə görə, layihə 3 komponentdən ibarətdir ki, bura qanunvericiliyin təkmilləşdirilməsi və Avropa standartlarına uyğunlaşdırılması; qayda və təkliflərin hazırlanması, seminar və treninqlərin təşkili; investorların bilik səviyyəsinin artırılması daxildir: «Layihənin icrası çərçivəsində 40 missiyanın Azərbaycana səfəri gözlənilir ki, bu səfərlər zamanı ölkədə hazırkı qanunvericilik araşdırılacaq və fərqlər müəyyənləşdiriləcək».
Qeyd edək ki, AB tərəfindən maliyyələşdirilən bu layihə Polşa Maliyyə Nəzarəti Agentliyi tərəfindən həyata keçiriləcək. Layihənin maliyyələşdirilməsi üçün AB tərəfindən 1 mln. avro məbləğində qrant ayrılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
