Bakı. Ramiz Mikayıloğlu - APA. Azərbaycanın qonşusu Rusiyada əhalinin 2,5 milyon nəfəri narkotik vasitələrin istifadəçisidir.
APA-nın xəbərinə görə, bu məlumat Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupu tərəfindən hazırlanan “Azərbaycan Respublikasında narkotiklərə nəzarət sahəsində 2013-cü il üçün ölkə məruzəsi”ndə əksini tapıb.
Sənəddə qeyd olunur ki, 2013-cü ilin statistikasına əsasən Rusiyada narkotik istifadəçilərinin 20 faizi məktəblilər, 60 faizi 30 yaşına qədər gənclər, 20 faizi daha yaşlı nəslin nümayəndələridir. 2013-cü ildə Rusiya ərazisində hüquq-mühafizə orqanları tərəfindən 38 tondan artıq narkotik vasitə qanunsuz dövriyyədən çıxarılıb.
İranda 1,5 milyon nəfər narkotik istifadəçisi qeydə alınıb. Bunlardan 700 min nəfər narkotik vasitələrdən daim istifadə edəndir. 2013-cü ildə İranda hüquq-mühafizə orqanları tərəfindən 430 tondan artıq narkotik vasitə qanunsuz dövriyyədən çıxarılıb. Qeyd edək ki, İranda son 5 il ərzində hər il 600 tona yaxın narkotik vasitə qanunsuz dövriyyədən çıxarılıb ki, bunların da 75 faizini heroin və həşiş təşkil edib.
Digər qonşu dövlət Gürcüstanda 2013-cü il ərzində 200 min narkotik istifadəçisi qeydə alınıb. Onlardan 35 min nəfər narkotik vasitələrdən asılı olan xəstələr, 165 mini profilaktik qeydiyyatda olanlardır.
Türkiyəyə gəlincə, hazırda qardaş ölkədə 4 milyon narkotik istifadəçisi qeydiyyata götürülüb. Onlardan 2,19 faizi daimi narkotik istifadəçisidir. Keçən il Türkiyə hüquq-mühafizə orqanlarının keçirdikləri əməliyyat-axtarış tədbirləri nəticəsində 38 min 534 nəfər məsuliyyətə cəlb olunub. 2013-cü ildə bu ölkədə 46 ton 918 kq kannabis bitkisi, 6 ton 412 kq heroin, 106 kq həşiş, 589 kq kokain qanunsuz dövriyyədən çıxarılıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
