Bakı-APA. Aprelin 9-da Cons Hopkins Universitetinin (Johns Hopkins University) Mərkəzi Asiya və Qafqaz İnstitutu tərəfindən “İstanbul Prosesi-26 aprel, Astana görüşü: 2014-cü ildən sonrakı Əfqanıstanda aydınlığa doğru” mövzusunda tədbir təşkil edilib. Azərbaycanın Vaşinqtondakı səfirliyindən APA-ya verilən məlumata görə, tədbirdə çıxışçı qismində Azərbaycan səfirliyinin müşaviri Nərgiz Qurbanova, Qazaxıstanın ABŞ-dakı səfiri Kairat Umarov, Dövlət Katibinin Cənubi və Mərkəzi Asiya ölkələri üzrə Köməkçisinin müavini Lin Treysi və Türkiyə səfirliyinin müşaviri Timur Söyləməz çıxış ediblər.
Səfirliyin müşaviri Nərgiz Qurbanova çıxışı zamanı İstanbul Prosesi çərçivəsində həyata keçirilən Etimad Quruculuğu Tədbirlərində (EQT), xüsusilə regional infrastruktura EQT-də Azərbaycanın aparıcı rolundan danışıb, bu xüsusda Əfqanıstanın iqtisadiyyatının inkişafı üçün bu ölkənin regional nəqliyyat şəbəkəsi vasitəsilə dünya bazarına inteqrasiyasının vacibliyini vurğulayıb: “Əgər biz Əfqanıstanı inkişaf etmiş, sabit və müstəqil görmək istəyiriksə, ölkənin iqtisadiyyatının inkişafına dəstək verməliyik”.
Əfqanıstanın inkişafının təkcə daxili amillərdən deyil, həm də region ölkələrində gedən inkişaf proseslərindən də asılı olduğunu qeyd edən N. Qurbanova, xüsusilə 2014-cü ildən sonra bu ölkənin regional ticarət və nəqliyyat şəbəkəsinə qoşulmasının vacibliyini qeyd edib. Bu proseslərdə Azərbaycanın yaratdığı imkanlardan danışan N. Qurbanova Azərbaycanın coğrafi mövqeyi, o cümlədən Şimal-Cənub, Şərq-Qərb oxu üzərində yerləşməsi, Qara və Aralıq dənizləri limanlarına yaxınlığı, habelə Azərbaycan tərəfindən həyata keçirilən regional infrastruktur layihələrinin əhəmiyyətini vurğulayıb. Bu amillərin Azərbaycanın regionda həyata keçirilən bütün nəqliyyat layihələrinin, o cümlədən TRASECA, CAREC proqramının təşviq etdiyi nəqliyyat dəhlizləri kontekstində vacib rol oynadığını bildirib.
Dövlət Katibinin Cənubi və Mərkəzi Asiya ölkələri üzrə Köməkçisinin müavini Lin Treysi İstanbul prosesindən bəhs edərkən Azərbaycan, Türkiyə və Qazaxıstan tərəfindən Əfqan diplomatlarına təlimlərin təşkilini və elm sahəsində verdiyi töhfələri təqdir edib. Azərbaycanın inşa etdirdiyi Ələt limanının regional yükdaşımanın artmasına təsir edəcəyini vurğulayan xanım L. Treysi Azərbaycan, Gürcüstan və Türkiyənin birgə iştirakı ilə tikilən Bakı-Tiflis-Qars dəmiryolu xəttinin regionu Avropa ilə əlaqələndirəcəyini qeyd edib.
Tədbir bu ilin 26 aprel tarixində İstanbul prosesinin Almatıda keçiriləcək yüksək vəzifəli nümayəndələrinin görüşünə həsr edilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
