Hadisə

Ana səhifə

Hadisə

Nəsimi Nəbizadə ilə "Ana xəbər" bloku – 12 May

12 may 2016 18:16 (UTC +04:00)

GÜNÜN ŞƏRHİ

ABŞ doğrudanmı Rusiyanın Cənubi Qafqazda möhkəmlənməsinə imkan yaradır? Sualın cavabı başqa bir sualdadır? ABŞ-ın Cənubi Qafqazda mövqeyi möhkəm idimi? Birmənalı şəkildə xeyir. Ermənistan Rusiyanın faktiki vilayətinə çevrilib, Rusiya hələ 8 il öncə Gürcüstan ərazilərinin bir hissəsini rəsmən ilhaq edib, Azərbaycan isə... Azərbaycan isə Rusiyanın deyil, məhz Qərbin maraqlarına daha çox cavab verən qlobal enerji və infrastruktur layihələri gerçəkləşdirməsinə rəğmən Rusiyadan çox Vaşinqtonun təzyiqləri ilə üzləşib. Rusiya hələ əvvəldən bu regionda möhkəm mövqelərə malik olub və ötən on illər ərzində ABŞ hətta Rusiyaya tam arxa çevirmiş Gürcüstana belə tam sahib çıxa bilməyib. Brayza bir məqamda haqlıdır, ABŞ-ın Cənubi Qafqaz siyasəti kökündən səhvdir. Amma bölgənin tam da Rusiyanın nəzarətinə verilməsi fikri də yanlışdır. Sadə bir məqam var - Vaşinqton Rusiyanı iqtisadi baxımdan çökdürmək üçün qlobal siyasət yürüdür, neftin qiymətini ucuzlaşdırır, dolların uçot dərəcəsini artırmaqla milli valyutaları zəiflədir. Paralel olaraq da NATO Avropanın şərqində möhkəmlənir, Rusiyanı ciddi bir psixoloji təzyiq altında saxlayır. Bu proseslər fonunda Cənubi Qafqaz və Dağlıq Qarabağ münaqişəsi ABŞ üçün əhəmiyyətini deyil, öncəliyini itirib. ABŞ-ın “beyinləri” hesab edir ki, Rusiya əvvəl iqtisadi, daha sonra isə siyasi baxımdan çökərsə, bütün bölgələrdə, o cümlədən Cənubi Qafqazda mövqeləri zəifləyəcək. Praqmatik hesablamadır.