Bakı. Vüsal Nəbiyev - APA-Economics. Azərbaycanda ilk dəfə olaraq “Tier III” səviyyəli regional Data Mərkəz istifadəyə veriləcək.
“APA-Ecomomics” xəbər verir ki, bunu Rabitə və Yüksək Texnologiyalar Nazirliyinin Beynəlxalq Əlaqələr və Hesablaşma Mərkəzinin nümayəndəsi Məzahim Quliyev brifinq zamanı bildirib.
M. Quliyevin sözlərinə görə, ABŞ-ın “Uptime” İnstitutunun nümayəndələri sertifikatlaşdırma mərhələsini yerinə yetirdikdən sonra artıq Data Mərkəz istismara veriləcək.
“İnstitutunun nümayəndələri may ayında Data Mərkəzi sınaqdan keçirəcəklər. Müvafiq sertifikat verildikdən sonra mərkəzin iyun ayında istismara verilməsi gözlənilir”, - deyə o bildirib.
Qeyd edək ki, Data Mərkəzin yaradılması BMT-nin İnkişaf Proqramı (UNDP) çərçivəsində həyata keçirilib.
Qurum rəsmisi artıq dünyada məşhur olan “Google”, “Facebook” şirkətlərinin Azərbaycanda istismara veriləcək Data Mərkəzlə əməkdaşlıq edəcəyini bildirib.