Moskva vilayəti, Kubinka - APA. Moskva vilayətinin Kubinka rayonunda yerləşən Alabino poliqonunda təşkil olunan "Beynəlxalq Ordu Oyunları - 2016" yarışlarının təntənəli bağlanış mərasimi keçirilib. APA-nın yarışları işıqlandıran əməkdaşının verdiyi məlumata görə, bağlanış mərasimində Azərbaycanın müdafiə naziri general-polkovnik Zakir Həsənov da iştirak edib.
"Tank biatlonu" üzrə keçirilən yarışların son günü rəsmi qonaqlar final mərhələsinə çıxmış komandaların mübarizəsini izləyiblər və 23 nominasiya üzrə müxtəlif müsabiqələrdə qalib gəlmiş hərbi qulluqçuların mükafatlandırılmasında iştirak ediblər.
"Beynəlxalq Ordu Oyunları - 2016"-nın bağlanış mərasimində Rusiyanın müdafiə naziri ordu generalı Sergey Şoyqu da iştirak edib.
Müdafiə naziri Zakir Həsənov "Tank biatlonu" yarışında xüsusi fərqlənən tankçılarlarımızla görüşüb. Nazir onların ilk dəfə olaraq belə bir mötəbər yarışda iştirak edərək Azərbaycanı layiqincə təmsil etdiklərini bildirib və hərbçilərimizə xidmətlərində uğurlar arzulayıb.
"Beynəlxalq Ordu Oyunları - 2016" yarışlarının təntənəli bağlanış mərasimi bayram konserti və atəşfəşanlıqla başa çatıb.
Qeyd edək ki, iyulun 30-dan başlayan hərbçilərin beynəlxalq yarışlarının "Tank biatlonu" və "Xəzər kuboku" müsabiqələrində iştirak edən Azərbaycan Silahlı Qüvvələrinin nümayəndələri hər iki nominasiyada müxtəlif mərhələlərdə qaliblər sırasında olmaqla ölkəmizi yüksək səviyyədə təmsil ediblər. Azərbaycanlı hərbçi, kapitan rütbəli Rəşad Atakişiyev "Tank biatlonu" üzrə yarışda "ən yaxşı tank kapitanı" nominasiyası üzrə qalib olub.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
