Mədəniyyət siyasəti

Ana səhifə

Mədəniyyət siyasəti

Azərbaycan filmi beynəlxalq festivalın “Ən yaxşı film”i seçilib

12 sentyabr 2016 08:06 (UTC +04:00)

Bakı. Cavid Zeynallı – APA. Rafiq Əliyev və Cavid Təvəkkülün “Dərs” bədii filmi 25-ci “Kinoşok” (Киношок) beynəlxalq film festivalının “KinoMalıŞok” (КиноМалыШок) proqramının “Ən yaxşı film” nominasiyasında qalib olub.

C. Cabbarlı adına “Azərbaycanfilm” kinostudiyasından APA-ya verilən məlumata görə, MDB ölkələri, Latviya, Litva və Estoniyanın iştirak etdiyi festival çərçivəsində film Anapa, Krımsk, Novorossiysk və Temryuk şəhərlərinin kinoteatrlarında nümayiş etdirilib.

“Dərs” tammetrajlı bədii filmi 2015-ci ildə Mədəniyyət və Turizm Nazirliyinin dəstəyi ilə “Azərbaycanfilm” kinostudiyasında lentə alınıb.

Filmin beynəlxalq təqdimatı 34-cü Münhen Film Festivalında baş tutub. Ekran əsəri məktəb həyatından, yeniyetmə məktəblilərin qarşılıqlı münasibətlərindən, dostluğa və həyata baxışlarından, bu baxışların formalaşmasından bəhs edir.

Ekran əsərinin ssenari müəllifləri Elza Ağayeva və Anastasiya Volkova, quruluşçu operatoru Rauf Qurbanəliyev, quruluşçu rəssamı Fikrət Ələkbərov, bəstəkarı Tünzalə Ağayeva, icraçı prodüseri Vüsal Abbasov, prodüseri Müşfiq Hətəmovdur.