Sahibkarlıq

Sahibkarlıq

Daşkəsəndə yerli sakinlər və arıçı fermerlərlə görüş keçirilib - FOTO

01 aprel 2022 12:05 (UTC +04:00)

30-31 mart tarixlərində “AzerGold” QSC Korporativ Sosial Məsuliyyət Komitəsinin (KSM) iştirakı ilə Daşkəsəndə yerli sakinlərlə görüşlər keçirilib. QSC-dən “APA-Economics”ə verilən məlumata görə, Cəmiyyətin Çovdar İnteqrəolunmuş Regional Emal Sahəsinin yaxınlığında yerləşən Quşçu və Çovdar kəndlərində yaşayan əhalinin sosial ehtiyaclarının müəyyənləşdirilməsi məqsədilə keçirilən görüşdə Komitənin sədri, “AzerGold” QSC-nin İdarə Heyəti sədrinin müavini Xəyyam Fərzəliyev çıxış edərək, sosial sahədə görülən işlər və yeniliklər barədə geniş məlumat verib. X. Fərzəliyev yerli əhali və icmalarla iş prioritetləri çərçivəsində icra edilməkdə olan layihələrin əhəmiyyətini vurğulayıb. Bildirilib ki, Sosial Təsir və Məsuliyyət Siyasəti çərçivəsində təşkil edilən bu tip tədbirlər dövlət proqramlarına dəstək xarakteri daşımaqla yanaşı, bu bölgədə yaşayan ailələrin qayğı ilə əhatələnməsinə xidmət edir.
Daha sonra kənd sakinlərinin müraciətləri dinlənilib, yeni təşəbbüslərlə bağlı fikir mübadiləsi aparılıb. Komitə sədri müraciətlərlə bağlı müvafiq addımların atılması üçün tapşırıq və tövsiyyələrini verib. Bununla yanaşı, KSM komitəsinin nümayəndələri tərəfindən sosial ehtiyacların hərtərəfli araşdırılması üçün sorğular keçirilib.
Qeyd edək ki, Cəmiyyət tərəfindən hədəf qruplarına yönəlmiş təşəbbüs və layihələr çərçivəsində kənd sakinləri ilə ənənəvi görüş və sorğuların vaxtaşarı təşkili davam etdiriləcək.
Növbəti görüşdə Daşkəsən rayonunun Bayan, Quşçu və Zəyəm kəndlərində fəaliyyət göstərən arıçılar iştirak ediblər. Görüşün keçirilməsində əsas məqsəd kənd arıçılarını bir araya gətirərək mövcud imkanlar və “AzerGold” QSC-nin təşkilatçılığı, Kiçik və Orta Biznesin İnkişafı Agentliyinin dəstəyi ilə keçirilən “Arıçılara dəstək” layihəsi barədə məlumatlandırmaq, layihədən yararlanması imkanlarını müəyyənləşdirməkdir. Tədbirdə arıçılıq fəaliyyəti zamanı təsərrüfat sahiblərinin qarşılaşdıqları çətinliklər və onların aradan qaldırılması yolları müzakirə edilib, təşəbbüslərlə bağlı fikir mübadiləsi aparılaraq, təkliflər qeydə alınıb.
Layihə çərçivəsində fermerlərə peşəkarlar tərəfindən metodiki yardımın göstərilməsi, arıxanalarda baytar-sanitar qaydalara uyğun işlərin aparılması, arıçılığa ziyan vuran parazitar xəstəliklərin müalicə və profilaktikası, bu sahə üzrə innovativ yeniliklərin tətbiqi və s. istiqamətlərdə məlumatlılığın artırılması məqsədilə təlimlərin təşkil edilməsi planlaşdırılır. Bununla yanaşı, təlimlərdə iştirak edən kənd sakinlərinə arı ailələri və müvafiq ləvazimatların paylanması, bununla yanaşı, ərazidə nektar verən ağac və kolların əkilməsi nəzərdə tutulur.