“Zaqatala” PFK ilə “Music Gallery” arasında tərəfdaşlıq haqqında müqavilə imzalanıb - FOTO

“Zaqatala” PFK ilə “Music Gallery” arasında tərəfdaşlıq haqqında müqavilə imzalanıb - FOTO
# 12 fevral 2024 17:00 (UTC +04:00)

Fevralın 12-si Futbolun İnkişaf Fondunun vasitəçiliyi ilə “Zaqatala” futbol klubu və “Music Gallery” arasında sponsorluq müqaviləsinin imzalanma mərasimi keçirilib.

APA xəbər verir ki, tədbiri giriş sözü ilə açan FİF-in icraçı direktoru Tural Piriyev FİF-in vasitəsilə ölkə futboluna daha bir özəl sektor nümayəndəsinin cəlb olunmasından qürur duyduğunu bildirib və "AGA Group"un rəhbərliyinə bölgə klubuna dəstəyə görə təşəkkür edib.

Daha sonra “Zaqatala” PFK-nın İdarə Heyətinin üzvü Musa Qurbanov, “AGA Group”un təsisçisi Aydın Demirçi və icraçı direktoru Qafar Demirçi ilə yanaşı, “Music Gallery”nin direktoru Məsməxanım Ağayeva çıxış edib.

Çıxışlardan sonra imzalanma mərasimi baş tutub. Tərəfdaşlıq müqaviləsini “Zaqatala” futbol klubunun İdarə Heyətinin sədri Şaban Şirdanov və “AGA Group”un təsisçisi Aydın Demirçi imzalayıblar. Hər iki tərəf bölgə futboluna dəstəyin vacibliyini vurğulayaraq, əməkdaşlığın uğurlu olacağına inandıqlarını bildiriblər.

Məlumat üçün bildirək ki, Fond Zaqatala PFK-ya bir çox sahədə dəstək olur. Bu il üçün qarşıya qoyulan əsas məqsədlər klubun dayanıqlı inkişaf strategiyasının hazırlanması, gəlirlərin diversifikasiyası və idarəetmə strukturunun təkmilləşdirilməsidir. Gəlirlərin diversifikasiyası ilə əlaqədar hazırda "Biznes klub" layihəsi tətbiq olunur və oyun günü gəlirlərinin artırılması yönündə işlər aparılır.

Qeyd edək ki, 1993-cü ildən Azərbaycanda fəaliyyət göstərən “Music Gallery” mağazalar şəbəkəsi artıq 30 ildir ki, müasir ev üçün məişət texnikası, elektronika məhsulları və musiqi alətlərinin aparıcı ticarət şəbəkəsi olaraq fəaliyyətinə davam edir. “Music Gallery” özünəməxsus məhsul çeşidi, yüksək keyfiyyət, üstün xidmət və cəlbedici qiymət standartlarını özündə birləşdirir.

Hal-hazırda mağazalar şəbəkəsinin Bakı şəhərində Gənclik, İnşaatçılar, 28 May, Əhmədli, İnqilab, “Bakıxanov Mall” və “28 Mall”da yerləşən 7, Şirvan şəhərində isə 1 mağazası olmaqla, ümumilikdə 8 mağazası fəaliyyət göstərir. Şirkətin məqsədi müştərilərə yüksək keyfiyyətli xidmət, rahatlıq və fərdi yanaşma nümayiş etdirməkdir.

“Music Gallery” Azərbaycanda “Yamaha” və “Sharp” brendlərinin eksklüziv, “Sony”, “Samsung”, “Bosch”, “Beko”, “LG”, “Gorenje”, “Philips”, “Honor”, “Vestel”, “Braun”, “Delonghi”, “Kenwood” kimi tanınmış brendlərin isə rəsmi tərəfdaşıdır.

#
#

ƏMƏLİYYAT İCRA OLUNUR