Sənaye və energetika

Ana səhifə

Kulevi Neft Terminalı Gürcüstanda bərpa etdiyi 6 dəmiryol xəttinin 3-nü oktyabrda istifadəyə verəcək

15 sentyabr 2008 09:27 (UTC +04:00)

Bakı. Nicat Mustafayev – APA-Economics. Azərbaycan Respublikası Dövlət Neft Şirkətinin (ARDNŞ) Gürcüstanda yerləşən Kulevi Neft Terminalı ilə bu ölkənin Dəmir Yol Departamenti arasında bağlanılan müqaviləyə əsasən, terminal 6 dəmiryol xəttinin bərpasını öz üzərinə götürüb və bunun 3-ü artıq bu ilin oktyabr ayında istifadəyə veriləcək.
Kulevi terminalının mətbuat xidmətindən «APA-Economics»ə verilən məlumata görə, dəmir yollarında təmir işləri ötən ayın əvvəlində başlayıb və artıq 2-3 həftədən sonra üç xətt istismara veriləcək. Ümumilikdə, təmiri nəzərdə tutulan dəmir yol xətlərinin uzunluğu 5 km-ə yaxındır. Bundan başqa, Kulevi Neft Terminalı Senakidə (Gürcüstan) «Kərpiç zavodu» adlanan stansiyaya gedən 870 metrlik dəmir yol xəttinin təmirini də öz üzərinə götürüb. Eyni zamanda, terminal tərəfindən Xobi rayonunda uzunluğu 870 metr olan dəmir yol xətti də bərpa ediləcək.
Bütün bunlar terminala daşınan idxal neftin nəqletmə həcmini artırmaq üçün nəzərdə tutulub. İnşası planlaşdırılan 6 dəmir yol xətti işə düşəndən sonra vaqonların stansiyalarda qəbul edilib yola salınması daha da asanlaşacaq. Bundan əlavə Poti (Gürcüstan) yaxınlığında yerləşən «Caladidi» stansiyasında əlavə 2 xəttin tikilməsi və «Caladidi»dən «Kolxeti» stansiyasına qədər olan məsafədə yeni xəttin çəkilməsi üçün geoloji işlər aparılır.
Qeyd edək ki, gürcü mütəxəssisləri tərəfindən inşa ediləcək dəmir yol xətlərinin maliyyə dəstəyini neft terminalı öz üzərinə götürub.
Xatırladaq ki, Kulevi terminalı bu ilin mayın 16-da istifadəyə verilib. Kulevi terminalında eyni zamanda yük boşaldılması üçün 168 vaqon-sistern qəbul etmək mümkündür. Rezervuar parkının ümumi həcmi 320 min kubmetr təşkil edir. Liman tutumu 100 min tonadək olan tankerləri qəbul etmək iqtidarındadır.
İlkin mərhələdə terminal ildə 10 mln. tonadək neft məhsulu qəbul edə biləcək. İki il ərzində buraxılış qabiliyyəti ildə 15-20 mln. tonadək, rezervuar parkının həcmi isə 380 min kubmetrədək artırıla bilər.
Kulevi terminalının tikintisinə 2000-ci ilin yazından Gürcüstan dəmir yolu və Avstriyanın «Argomar Oil» şirkəti başlayıb. Tikinti işləri 2002-ci ildə maliyyə problemləri səbəbindən dayandırılıb. Lakin 2004-cü ilin sentyabrında beynəlxalq konsorsium yaradılıb və «Argomar Oil»la yanaşı, bura bir sıra gürcü və xarici biznesmenlər daxil olub. ARDNŞ isə 2007-ci ilin əvvəlində terminalı bu konsorsiumdan satın alıb.