Sənaye və energetika

Ana səhifə

«Shirvan Oil» yanvar-avqust aylarında qaz hasilatını 32% azaldıb

10 oktyabr 2008 07:28 (UTC +04:00)

Bakı. Vüqar Mustafayev – APA-Economics. Azərbaycanın quru sahəsində yerləşən «Kürovdağ» yatağının işlənməsi ilə məşğul olan «Shirvan Oil» Əməliyyat Şirkəti 2008-ci ilin yanvar-avqust ayları ərzində 11,5 mln. kubmetr həcmində qaz hasil edib. Bununla da şirkət qaz hasilatını 2007-ci ilin analoji 8 aylıq göstəricisinə nisbətən 31,9% azaldıb. Təkcə avqust ayında yataqdan 0,4 mln. kubmetr qaz hasil olunub. Bu barədə «APA-Economics»ə «Shirvan Oil» Əməliyyat Şirkətinin baş ofisindən məlumat verilib.
Xatırladaq ki, «Kürovdağ» yatağının işlənməsinə dair saziş ARDNŞ-la Böyük Britaniyanın «Caspian Energy Group» şirkəti arasında 2004-cü ilin noyabrın 5-də imzalanıb. Hər iki tərəfin layihədəki iştirak payı 50%-ə bərabərdir.
Qeyd edək ki, Bakıdan 106 km cənub-qərbdə, Kürün hövzəsində yerləşən bu yatağın ümumi sahəsi 115 kv. km təşkil edir. Yataq şərti olaraq üç bloka bölünüb – Şimal, Mərkəzi və Cənub blokları. Neftin qalıq ehtiyatları 5,5 mln. ton həcmində qiymətləndirilir. Şirkətin quyu fondu 350 vahid, neftin orta sutkalıq hasilat səviyyəsi 677 ton təşkil edir. Neft hasilatının səviyyəsi sazişin qüvvədə olacağı 25 il ərzində 2003-cü ilə nisbətən ən azı 50% artırılmalıdır. Lakin kontraktın müddəti bitdikdən sonra o, tərəflərin razılığı ilə daha 5 il müddətinə uzadıla bilər.