Sənaye və energetika

Ana səhifə

«Azəri-Çıraq-Günəşli» blokunda neft hasilatı dekabr ayınadək bərpa olunmaya bilər

10 oktyabr 2008 11:11 (UTC +04:00)

«APA-Economics»in məlumatına görə, Qazaxıstanda keçirilən beynəlxalq neft və qaz konfransında çıxış edən Azərbaycan Respublikası Dövlət Neft Şirkətinin (ARDNŞ) əməliyyat idarəsinin rəis müavini Vidadi Rüstəmov AÇG strukturunda hasilatın bu ayın sonuna qədər bərpa olunacağını bildirib.
Bu arada isə, layihənin operatoru olan BP şirkətinin saytında yerləşdirilən məlumatda qaz sızmasının səbəbləri ilə bağlı «Qərbi Azəri» platformasında aparılan araşdırmalar davam etdiyindən hasilatın başlanma tarixinin qeyri-müəyyən olması qeyd edilib. Rəsmi veb-saytda yerləşdirilən məlumata əsasən, AÇG strukturunda hasilatın dekabra qədər tam həcmdə bərpa olunmayacağı istisna edilmir.
Məlumat üçün qeyd edək ki, qaz sızmasından sonra platformaların işinin dayandırılması və ətrafdakı digər hasilat platformalarında aparılan ehtiyat tədbirləri nəticəsində «AÇG» blokunda neft hasilatı 60%-dən çox azalıb.
Ümumilikdə, AÇG-da gündəlik neft hasilatının həcmi 800 min bareldən çox olub.
Qeyd edək ki, bu ilin iyul ayında AÇG-da neft hasilatının orta gündəlik səviyyəsi 841,169 min barel təşkil edib. Hesabat dövründə «Çıraq-1» platformasında gündəlik orta hesabla 124,801 min barel, «Azəri»də isə 668,624 min barel neft hasil olunub. Cari ilin aprel ayından hasilat prosesinə cəlb olunan «Günəşli» yatağının dərinsulu hissəsində isə orta hesabla gündə 47,839 min barel neft çıxarılıb.
Xatırladaq ki, ötən il «Azəri-Çıraq-Günəşli» yataqlar blokunda neft hasilatının orta gündəlik səviyyəsi 685,5 min barelə bərabər olub. Belə ki, «Çıraq-1»dən gündə orta hesabla 132,406 min barel, «Azəri»dən isə 553,092 min barel neft hasil edilib.
«BP-Azerbaijan» şirkətinin proqnozlarına əsasən, 2008-ci ildə «Çıraq-1» platformasından gündəlik orta hesabla 134 min barel, «Mərkəzi Azəri»dən 243,5 min barel, «Qərbi Azəri»dən 235,3 min barel, «Şərqi Azəri»dən 144,4 min barel, dərinsulu «Günəşli»dən isə 82,8 min barel neft hasil olunacaq. Müqayisə üçün bildirək ki, 2006-cı ildə bu yataqlardan ümumilikdə gündəlik orta hesabla 472 min barel neft hasil edilib.
Qeyd edək ki, «Azəri-Çıraq-Günəşli» yataqlarının işlənməsi layihəsində BP (operator - 34,1%), «Chevron» (10,2%), ARDNŞ (10%), «Inpex» (10%), «Statoil» (8,6%), «ExxonMobil» (8%), TPAO (6,8%), «Devon» (5,6%), «Itochu» (3,9%) və «Hess» (2,7%) şirkətləri iştirak edir.