Sənaye və energetika

Ana səhifə

ARDNŞ “Ümid” yatağında dərin özüllü platformanın ilk blokunun quraşdırılmasına başlayıb

11 oktyabr 2008 11:06 (UTC +04:00)

Bakı. Elnur Hüseynquluyev-APA-Economics. Azərbaycan Respublikası Dövlət Neft Şirkəti (ARDNŞ) son 28 ildə ilk dəfə olaraq öz imkanları hesabına «Ümid» yatağında işə başlayıb. ARDNŞ-dan «APA-Economics»ə verilən məlumata görə, yataqda dərinözüllü platformanın ilk blokunun quraşdırılması həyata keçirilir. «Ümid-1» yatağındakı birinci platformanın sifarişçisi «Nərimanov» adına NQÇİ, baş podratçısı «Neftqaztikinti» tresti, subpodratçısı isə Heydər Əliyev adına Dərin Özüllər Zavodudur.

Layihə «Neftqazlayihə» institutunda hazırlanıb. İki bloklu platforma Heydər Əliyev adına Dərin Özüllər Zavodunda 1990-cı ildə hazırlanıb, hündürlüyü 133 metr olan «Çıraq-6» platformasına məxsus blokun detalları əsasında quraşdırılıb.
Blok iki hissəyə ayrılıb, bütün qaynaqlanmış sahələr yenidən işlənib, platformadakı köhnəlmiş elementlər yeniləri ilə əvəz olunub, modernləşdirilib və sınaqdan keçirilib. «Ümid-1» platformasının birinci blokunun hündürlüyü 68 metr, çəkisi isə 2300 tondur.

On ayağı olan platformanın hər bir ayağı üçün dənizin dibində torpağa 2 və ya 3 borulu svaylar vurulur ki, bu da platformanın 40-50 istismar ili ərzində davamlılığını təmin etməyə qadirdir. Bu proses hələ bir neçə həftə davam edəcək. Platformanın ikinci blokunun noyabr ayında quraşdırması nəzərdə tutulur. Bundan sonra isə böyük həcmdə suüstü işlərin görülməsi planlaşdırılır. Bu işlərin sırasına 8 istehsal modulunun quraşdırılması və onların qazma, enerji və digər avadanlıqlarla təmin edilməsi, habelə vertolyot meydançasının və 3 mərtəbəli yaşayış kompleksinin inşası daxildir. Platformanın 2009-cu ilin martında istismara verilməsi nəzərdə tutulur. Burada birinci kəşfiyyat quyusu 6500 metr dərinlikdə qazılacaq. Platforma 6 qaz quyusunun qazılması üçün nəzərdə tutulub. Bu layihə Qaz proqramının vacib buraxılış obyektlərindəndir.
6