Sənaye və energetika

Ana səhifə

Dünya Bankının ekoloji missiyası Azərbaycana gəlib

10 noyabr 2008 14:18 (UTC +04:00)

Bakı. Nicat Mustafayev – APA-Economics. Bu gün Dünya Bankının (DB) ekoloji missiyasının Azərbaycana səfəri başlayıb. Bu barədə «APA-Economics»ə DB-nın Bakı ofisindən məlumat verilib.
«Səfərin məqsədi Azərbaycanda həyata keçirilən «Abşeron yarımadasında neftlə çirklənmiş ərazilərin təmizlənməsi Layihəsi»nin gedişi ilə tanış olmaqdır. Missiyaya DB-nın nümayəndələri Frank Van Uordan və Volfard Pol başçılıq edirlər», - deyə nümayəndəlikdən bildirilib.
Noyabrın ortalarınadək davam edəcək səfər çərçivəsində missiyanın üzvləri layihə ilə bağlı Azərbaycanın müvafiq qurumlarında görüşlər keçirəcəklər.
Qeyd edək ki, «Abşeron yarımadasında neftlə çirklənmiş ərazilərin təmizlənməsi Layihəsi» bu ilin iyun ayında DB-nın Direktorlar Şurası tərəfindən təsdiqlənib.
Üç mərhələdən ibarət olan layihədə DB Fövqəladə Hallar Nazirliyinə radioaktiv tullantıların təmizlənməsi üçün 74 mln. ABŞ dolları, Azərbaycan Respublikası Dövlət Neft Şirkətinə (ARDNŞ) 1 000 hektar ərazinin təmizlənməsi və avadanlıqların alınmasına 60 mln. dollar və məişət tullantıların idarə edilməsi sahəsində yardıma 29,5 mln. dollar ayıracaq. Kreditin yarısı Beynəlxalq İnkişaf Assosiasiyası (IDA – DB Qrupunun üzvü), ikinci yarısı isə Beynəlxalq Yenidənqurma və İnkişaf Bankı (IBRD – DB Qrupunun üzvü) tərəfindən maliyyələşdiriləcək.
Xatırladaq ki, Abşeron yarımadasının neftlə çirklənmiş hissəsi 33,3 min hektar təşkil edir və bunun 15 min hektarı ARDNŞ-in balansındadır. Torpaqların təmizlənməsinə və rekultivasiyasına ARDNŞ tərəfindən artıq 63 mln. manat, Azərbaycan büdcəsindən isə 18,5 mln. manat ayrılıb.