Sənaye və energetika

Ana səhifə

«Nabucco» boru kəmərinin illik nəqletmə gücü 40 mlrd. kubmetrədək artırıla bilər

14 yanvar 2009 12:15 (UTC +04:00)

Bakı. Elmin İbrahimov – APA-Economics. Avropada yaşanan qaz böhranı fonunda ötən gün «Nabucco Gas Pipeline İnternational GmbH.» konsorsiumunun rəhbəri Raynhard Mitşek və layihənin tərəfdaşları İstanbulda bir araya gələrək layihənin çevik həyata keçirilməsinə yaranan zərurət və mövcud konyunktur ətrafında müzakirə aparıblar.
«APA-Economics»in məlumatına görə, görüşdə R.Mitşek bildirib ki, ilkin mərhələdə tədarükçülərin 15 mlrd. kubmetr həcmində qazının boru kəməri ilə nəql olunması və tədricən bu həcmin 30 mlrd. kubmetrədək artırılması nəzərdə tutulub. Konsorsium başçısının sözlərinə görə, layihənin icrasına yatırılacaq sərmayənin həcmi ilə bağlı son qərar bu il verildikdən sonra, layihənin reallaşması istiqamətində sərmayələrin qoyuluşuna 2010-cu ildən başlanacaq.
«Əgər tələb olunarsa, 2016-2018-ci illər ərzində əlavə sərmayə qoyuluşları hesabına boru kəmərinin gücü 35-40 mlrd. kubmetrədək artırıla bilər», - deyə R.Mitşek vurğulayıb.
Bundan başqa, R.Mitşek əlavə edib ki, «Nabucco» layihəsi Rusiyanın təşəbbüsü ilə reallaşdırılması planlaşdırılan digər layihələrdən daha az xərc hesabına başa gələcək və artıq onun iqtisadi səmərəliliyi öyrənilib. Tədarükçülərə gəldikdə isə, Konsorsium başçısı heç bir potensial mənbəni istisna etmək fikrində deyil: «Kəmər Azərbaycan, Türkmənistan, Misir, İran və Rusiya da daxil olmaqla, müxtəlif ölkələrdən qidalanacaq. Biz hər hansı tərəfinin potensial iştirakını istisna etmirik və bu layihə hamı üçün açıqdır».
Bundan başqa, R.Mitşek kəmərin inşasında istifadə olunacaq tikinti materiallarının dünya iqtisadi böhranı nəticəsində ucuzlaşması amilini əlavə üstünlük kimi qiymətləndirsə də, belə şəraitdə maliyyə institutlarından kreditlərin cəlb olunması prosesinin də çətinləşdiyini etiraf edib.
İstanbul görüşündə həmçinin qeyd olunub ki, bütün məsələlər layihədə maraqlı olan tərəflərin yanvarın 26-27-də Budapeştdə keçiriləcək sammitində müzakirə olunacaq. «Nabucco» kəmərinin əsas real təchizatçısı kimi qiymətləndirilən Azərbaycan da Macarıstan hökuməti tərəfindən bu sammitə dəvət olunub.
Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb.
İtaliya bəstəkarı Cüzeppe Verdinin 1842-ci ildə yazdığı operanın personajı Babil kralının adı ilə adlandırılan boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildən sonra Avropaya çatdırılması planlaşdırılır.