Sənaye və energetika

Ana səhifə

Azərbaycan taxıl və tərəvəz istehsalını rekord həddə çatdırıb

21 yanvar 2009 14:34 (UTC +04:00)

Bakı. Nicat Mustafayev – APA-Economics. Ötən il Azərbaycanda 904,7 min hektar sahədən ilkin çəkidə rekord səviyyədə - 2 498,3 min ton taxıl (qarğıdalı daxil olmaqla) məhsulu toplanılıb. Hektarın orta məhsuldarlığı 2007-ci ilə nisbətən 0,5 sentner artaraq 27,6 sentnerə yüksəlib.
Dövlət Statistika Komitəsindən «APA-Economics»ə verilən məlumata görə, 2008-ci ildə istehsal olunmuş taxılın 67,1%-ni və ya 1 677,5 min tonunu buğda təşkil edib. Ümumiyyətlə, 2008-ci ildə dənli və dənli paxlalıların əkin sahəsinin 2007-ci ilə nisbətən 22,3% və ya 165,2 min hektar artması ümumi istehsala müsbət təsir edib.
Ötən il xam pambığın istehsalı 2007-ci illə müqayisədə 44,7% azalaraq 55,4 min ton təşkil edib. Azalmanın səbəbi əkin sahəsinin 2007-ci ildəki 75,6 min hektardan 2008-ci ildə 48,5 min hektara qədər azalması olub.
Eyni vəziyyət tütünçülük sahəsində də özünü göstərib, 2008-ci ildə 2007-ci ilə nisbətən 14,7% az məhsul istehsal edilib. Tütün istehsalının aşağı düşməsinə səbəb onun əkin sahəsinin 2007-ci illə müqayisədə 17,7% azalması olub.
Bundan başqa, 2008-ci ildə Azərbaycanda 6,6 min hektar sahədə emal üçün şəkər çuğundurunun əkini aparılıb və həmin sahələrdən 181,5 min ton məhsul götürülüb. Nəticədə, 2007-ci ilə nisbətən şəkər çuğundurunun istehsalı 21,2% və ya 31,8 min ton artıb.
Kartof istehsalına gəldikdə isə, ötən il kartof istehsalı 2007-ci illə müqayisədə 38% artaraq 1,077 mln. tona çatıb.
Hesabat dövründə Azərbaycanda 1 228,3 min ton tərəvəz məhsulları istehsal edilib ki, bu göstərici ölkənin tərəvəzçilik tarixində ən yüksək nəticədir. Bostan məhsulları istehsalı isə 407,6 min ton olub və 2007-ci ilə nisbətən onun miqdarı 2,4% azalıb.
Ötən ildə əksər növ meyvələrin artması hesabına rekord miqdarda – 711,5 min ton meyvə və giləmeyvə istehsal edilib. Ümumilikdə, 2007-ci illə müqayisədə meyvə istehsalı 5%, üzüm istehsalı 11,4% artıb. Yaşıl çay yarpağı istehsalı isə 33,2% azalaraq 323 tona enib.