Sənaye və energetika

Ana səhifə

«BakQaz»ın rəisi Tahir Əliyev: «Əhalinin əksəriyyəti hələ də qeyri-standart cihazlardan istifadə edir»

22 yanvar 2009 09:46 (UTC +04:00)

«APA-Economics»in məlumatına görə, bunu Bakı şəhər Baş İstehsalat Qaz İdarəsinin (BakQaz) rəisi Tahir Əliyev bildirib.
T.Əliyevin sözlərinə görə, son vaxtlar baş verən hadisələrin əksəriyyəti vətəndaşların qaz təhlükəsizliyi qaydalarına riayət etməmələri nəticəsində baş verib: «Bununla əlaqədar «Azəriqaz» və «BakQaz» tərəfindən tədbirlər görülür. Artıq maarifləndirmə işlərinə başlanılıb və bu məqsədlə reydlər keçirilir».
«BakQaz» rəhbəri bildirib ki, dəm qazı ilə evlərə verilən qazın tərkibi arasında heç bir bağlılıq yoxdur. Digər tərəfdən, şəbəkənin qəbul etdiyi qazın müvafiq sertifikatı var. Qaz əvvəlcə emal olunur, şəbəkəyə daxil olandan sonra qazpaylayıcı stansiyalarda tərkibi bir daha təmizlənir və sonra istehlakçılara ötürülür.
T.Əliyev çoxmərtəbəli binaların əksəriyyətində tüstü bacalarının olmaması və ya pis vəziyyətdə olmasının da hadisələrin yaranmasında rol oynadığını vurğulayıb.
«BakQaz»ın araşdırmaları zamanı hələ də əhalinin əksəriyyətinin mənzillərin qızdırılmasında qeyri-standart cihazlardan, həmçinin İran sobalarından istifadə etdiyi aşkarlanıb. T.Əliyevin sözlərinə görə, çoxmərtəbəli binalarda mənzillərin qazla isidilməsi qadağan olunsa da, əhali buna riayət etmir.
«BakQaz» rəisi yanvar ayının ilk iki dekadasında qaz sızması və dəm qazından zəhərlənmə hallarının ötən ilin yanvar ayının müvafiq dövrü ilə müqayisədə çox olduğunu vurğulasa da, konkret rəqəmləri açıqlamayıb.