Sənaye və energetika

Ana səhifə

“İxrac məqsədli neft-qaz fəaliyyətinə xüsusi iqtisadi rejimin tətbiqi haqqında” qanun layihəsi qəbul edilib

02 fevral 2009 15:46 (UTC +04:00)

Bakı. Elbrus Seyfullayev – APA. Milli Məclisin bugünkü iclasında “İxrac məqsədli neft-qaz fəaliyyətinə xüsusi iqtisadi rejimin tətbiqi haqqında” qanun layihəsi ikinci və üçüncü oxunuşda qəbul edilib. APA-nın xəbərinə
görə, sənəd haqqında məlumat verən parlamentin sədr müavini Valeh Ələsgərov bildirib ki, qanun ölkə hüdudlarından, o cümlədən Xəzər dənizinin (gölünün) Azərbaycana aid hissəsindən kənarda həyata keçirilən neft-qaz əməliyyatları ilə əlaqədar Azərbaycanda ixrac məqsədli neft-qaz fəaliyyəti üçün xüsusi iqtisadi rejimin yaradılmasının və tətbiqinin əsaslarını müəyyən edir, bu sahədə dövlət, hüquqi və fiziki şəxslər arasında münasibətləri tənzimləyir. Müzakirələrdən sonra qanun layihəsi ikinci və üçüncü oxunuşda səsə qoyularaq qəbul edilib. İclasda həmçinin “İmmiqrasiya haqqında”, “Dövlət rüsumu haqqında” qanunlara əlavə və dəyişiklik təsdiqlənib. Millət vəkilləri “Arıçılıq haqqında” qanunu da ikinci oxunuşda səsə qoyaraq qəbul ediblər. Bundan başqa, MM-in daimi komissiyalarının tərkibinə dəyişiklik edilməsi ilə bağlı məsələyə də baxılıb. Deputat Çingiz Əsədullayev İqtisadi siyasət daimi komissiyasının sədr müavini seçilib. Deputatlar İntizam komissiyasının və Hesablayıcı komissiyanın da yenidən təşkili ilə bağlı məsələni müzakirə edərək qəbul ediblər.