Sənaye və energetika

Ana səhifə

İraq qazı «Nabucco» kəmərinin 2014-cü ildən işə düşməsini təmin edə bilər

18 may 2009 13:10 (UTC +04:00)

Bakı. Elmin İbrahimov, Rəşad Süleymanov – APA-Economics. İraqın şimal regionunda hasil olunan təbii qaz «Nabucco» kəmərinin 2014-cü ildən işə düşməsini təmin edə bilər. «APA-Economics»in məlumatına görə, bu barədə «Nabucco»nun tərəfdaşı olan Türkiyənin BOTAŞ şirkətinin adının açıqlanmasını istəməyən rəsmisi «Reuters» agentliyinə bildirib.

Avstriyanın OMV və Macarıstanın MOL şirkətləri isə kəmərin ilkin mərhələdə işə düşməsi üçün lazım olacaq gündəlik 1,5 mlrd. kub fut (təqribən 42,475 mln. kubmetr) qaz həcmini təmin etmək üçün İraqın şimalında bir qaz layihəsində pay almaq niyyətlərini açıqlayıblar.

Qeyd edək ki, «Nabucco» layihəsinin həyata keçirilməsinə dair sazişin iyunun 25-də Ankarada (Türkiyə) imzalanması planlaşdırılır.

«Nabucco» boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildən sonra Avropaya çatdırılması planlaşdırılır.

Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Layihənin ümumi investisiya dəyəri 7,9 mlrd. avrodur (12,3 mlrd. ABŞ dolları).