Sənaye və energetika

Ana səhifə

Ukraynalı ekspert: “Avropaya neft nəqlini həyata keçirəcək Odessa-Brodı layihəsində həm Ukrayna, həm də Azərbaycan maraqlıdır”

30 iyun 2009 08:38 (UTC +04:00)

Kiyev. Viktoriya Dementyeva – APA. “Qara dəniz vasitəsilə Avropaya neft nəqlini həyata keçirəcək Odessa-Brodı layihəsində həm Ukrayna, həm də Azərbaycan maraqlıdır. Bu layihə inkişaf perspektivlərini özündə saxlayır, amma təəssüf ki, çox yavaş inkişaf müşahidə olunur”. APA-nın Kiyevə ezam olunmuş müxbirinin məlumatına görə, bunu Qara dəniz regionunda avroatlantik əməkdaşlıq və geosiyasi problemlər üzrə tədqiqat mərkəzi – NOMOS-un rəhbəri Mixaylo Qonçar deyib. “Transnafto” dövlət şirkətinin İdarə Heyəti sədrinin sabiq müavini olan və Odessa-Brodı layihəsi ilə bağlı dəfələrlə Azərbaycan hökumətinin nümayəndələri ilə danışıqlar aparmış M. Qonçar bildirib ki, prezident Viktor Yuşşenkonun mövcud boru kəmərinin avers rejimə keçirilməsi haqda fərmanı Yuliya Timoşenko hökuməti tərəfindən icra olunmayıb. Bu səbəblə “Transnafto”da kadr dəyişikliyi aparılıb və Odessa-Brodı kəmərini Avropa istiqamətinə yönəltmək üçün işə başlanıb. Ekspert buna maneə törədəcək iqtisadi və ya texniki problemlər olmadığını və hər şeyin siyasi faktorlardan asılı olduğunu söyləyib. Onun fikrincə, bu layihə Rusiyaya sərfəli deyil və Moskvanı qıcıqlandırır.

M. Qonçar hesab edir ki, Rusiyanın Baltik boru kəməri sistemini istismara verəcəyi 2012-ci ilədək Odessa-Brodı layihəsinin icrası və bu mövzuda müzakirələr aktivləşə bilər. Belə ki, 60-cı illərdən mövcud olan “Drujba” kəmərini əvəz edəcək Baltik boru kəməri sistemi istismara verildikdən sonra Mərkəzi Avropa ölkələri, Macarıstan, Çexiya, Slovakiya karbohidrogen ehtiyatlarının idxalının azalması problemi ilə üzləşə bilərlər: “Onda Ukrayna və Avropa ölkələri yalnız Qara dəniz vasitəsilə Odessa-Brodı kəmərindən neft ala biləcəklər. Hazırda Ukraynadakı daxili siyasi problemlər üzündən Avropa ölkələrinin bu layihəyə şübhəli yanaşmasını başa düşmək olar. Lakin istənilən halda Azərbaycan və Ukraynanın bu məsələdə maraqları üst-üstə düşür və layihə inkişaf perspektivini qoruyur”.

odessa_brodı