Sənaye və energetika

Ana səhifə

ARDNŞ-yə «Fitch Ratings» beynəlxalq agentliyi tərəfindən reytinq verilməsi ilə əlaqədar təqdimat mərasimi keçirilib

29 iyul 2009 15:49 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan Respublikası Dövlət Neft Şirkətinə (ARDNŞ) «Fitch Ratings» beynəlxalq agentliyi tərəfindən reytinqin verilməsi ilə əlaqədar agentliyin nümayəndələri üçün təqdimat mərasimi keçirilib.
ARDNŞ-dan «APA-Economics»ə verilən məlumata görə, təqdimat mərasimini açan ARDNŞ prezidenti Rövnəq Abdullayev qonaqlara şirkətin Azərbaycan iqtisadiyyatındakı rolundan söz açıb. O qeyd edib ki, ARDNŞ 100% dövlət şirkəti olsa da, tam mənada kommersiya qurumu kimi fəaliyyət göstərir. Şirkətin son illərdə əldə etdiyi nailiyyətlərdən, iştirak etdiyi beynəlxalq miqyaslı iri layihələrdən söz açan R.Abdullayev bu layihələr sırasında Türkiyə və Gürcüstanda həyata keçirilən işləri də vurğulayıb.
«Türkiyənin ən böyük neft-kimya şirkəti olan «Petkim» ARDNŞ tərəfindən əldə ediləndən sonra yüksək səviyyəli menecment hesabına dünyada baş verən maliyyə-iqtisadi böhranı şəraitində gəlirlə işləməyə müvəffəq olub», - deyə ARDNŞ-ın prezidenti bildirib.
Gürcüstan iqtisadiyyatına indiyədək ARDNŞ tərəfindən 400 mln. ABŞ dolları həcmində vəsaitin qoyulduğunu bildirən R.Abdullayev bu ölkədə böyük neft terminalının alındığını, ARDNŞ-nin artıq Gürcüstan yanacaq və qaz bazarının 75%-nə nəzarət etdiyini vurğulayıb. Dünyanın müxtəlif şirkətlərinin potensialının onlara verilən reytinqlərlə qiymətləndirildiyini söyləyən ARDNŞ prezidenti rəhbərlik etdiyi şirkətin beynəlxalq aləmdə tanınan reytinq şirkətləri – «Fitch Ratings» və «Moody’s» ilə əməkdaşlıq etdiyini bildirib. Ötən il «Fitch», bu il isə «Moody’s»lə reytinq alınması üzrə müqavilələrin bağlandığını deyən R.Abdullayev «Fitch» təmsilçilərinin ARDNŞ-nin göstəriciləri ilə tanış olduqdan sonra şirkətə müvafiq reytinq veriləcəyinə əminliyini ifadə edib.
Azərbaycanın Avropanın enerji təhlükəsizliyinin təmin edilməsində əsas iştirakçılardan birinə çevrildiyini vurğulayan ARDNŞ prezidenti ölkənin iştirak etdiyi «Cənub Dəhlizi» layihəsinin əhəmiyyətindən də söz açıb. Ölkənin hazırda bir neçə istiqamətdə neft və qaz ixrac etdiyini deyən R.Abdullayev Azərbaycan qazına bu gün böyük marağın olduğunu, ölkənin Rusiya, İran, Gürcüstan, Türkiyə, Yunanıstan kimi ölkələrə qaz ixrac etmək imkanlarına malik olduğunu bəyan edib. ARDNŞ-yə təklif edilən bütün layihələrin diqqətlə öyrənildiyini deyən şirkət prezidenti daha risksiz və gəlirli layihələrə üstünlük veriləcəyini bildirib. ARDNŞ-nin yeni strukturlarda kəşfiyyat və qazma işlərinə start verdiyini qeyd edən R.Abdullayev həmçinin bildirib ki, görüləcək işlər nəticəsində yaxın illərdə Azərbaycanın təsdiqlənmiş qaz ehtiyatlarının həcmi 5 trln. kubmetrə çatdırılacaq.
Sonra ARDNŞ İqtisadiyyat və Uçot İdarəsinin Birgə Layihələr şöbəsinin rəisi Ənvər Qasımov «Fitch Ratings» təmsilçiləri üçün ARDNŞ-nin strukturunu, istehsal göstəricilərini, iştirak etdiyi layihələri əks etdirən slaydlar vasitəsilə geniş təqdimat keçirib. O, ARDNŞ-nin regionda qabaqcıl şirkət kimi fəaliyyəti, Gürcüstan və Türkiyədə həyata keçirilən iri miqyaslı layihələrdə iştirakı barədə ətraflı məlumat verib.
Qeyd edək ki, «Fitch» agentliyi tərəfindən ARDNŞ-ə reytinqin verilməsi Dövlət Neft Şirkətinin transmilli şirkətə çevrilməsi istiqamətində növbəti mühüm addım kimi dəyərləndirilir.