Sənaye və energetika

Ana səhifə

«Azərenerji» Abşeron yarımadasının enerji şəbəkəsində təmir işləri aparır

07 sentyabr 2009 10:25 (UTC +04:00)

Bakı. Rəşad Süleymanov – APA-Economics. Abşeron yarımadasını elektrik enerjisi ilə qidalandıran ötürücü şəbəkənin dayanıqlılığını təmin etmək məqsədi ilə «Azərenerji» ASC bir sıra tədbir həyata keçirib. Bu barədə «APA-Economics»ə «Azərenerji» ASC-nin mətbuat xidmətindən məlumat verilib.

Abşeron yarımadasındakı yaşayış massivləri və sənaye müəssisələrinin fasiləsiz və davamlı enerji ilə təchizatı məqsədi ilə 330 kV-luq 4-cü Şirvan hava xəttinin 500 kV-luq «Abşeron» yarımstansiyasına giriş və çıxış hissəsində təmir-bərpa işləri yerinə yetirilir. Paralel olaraq 220 kV-luq 2-ci «Şirvan» hava elektrik verilişi xəttində də köhnə ildırımötürücü tros yeni optik kabellə, yüksək gərginlikli elektrik hava xətlərinin dayanıqlığının artırılması məqsədilə korroziya nəticəsində qəza vəziyyətində olan lövbər və torpaqlama konturları yeniləri ilə əvəz olunub.

Bununla yanaşı, 110 kV-luq 9-cu və 10-cu «Səngəçal» hava elektrik verilişi xətlərində də müvafiq təmir-bərpa işləri aparılıb.

Qeyd edək ki, hazırda paylayıcı elektrik şəbəkələrinə orta hesabla gün ərzində 10 779 min kVt/saat elektrik enerjisi ötürülür. Son üç ay ərzində isə bu göstərici 29 769 min kVt/saat təşkil edib.