Sənaye və energetika

Ana səhifə

Gürcüstan: Ermənistanın «Nabucco» layihəsinə qoşulması barədə məlumatlar yalandır

08 sentyabr 2009 12:21 (UTC +04:00)

Bakı. Elmin İbrahimov – APA-Economics. Xəzər hövzəsində hasil olunacaq təbii qazın Rusiyadan yan keçməklə Avropa bazarına nəqlini nəzərdə tutan «Nabucco» layihəsində tranzit ölkə kimi Gürcüstanın Ermənistanla əvəzlənməsi barədə yayılan məlumatlar hiqəqətə uyğun deyil.

«APA-Economics»in BNE portalına (www.businessneweurope.eu) istinadən verdiyi məlumata görə, bunu Gürcüstanın energetika nazirinin birinci müavini xanım Marika Valiaşvili Türkiyə ilə Ermənistan arasında münasibətlərin normalaşdırılmasından sonra kəmərin Ermənistan ərazisindən çəkiləcəyi barədə bəzi mətbuat orqanlarında yayılan məlumatlara münasibət bildirərkən deyib.

Onun sözlərinə görə, «Nabucco» layihəsi Bakı-Tiflis-Ərzurum qaz kəmərinin davamı kimi həyata keçiriləcək və Azərbaycan hazırda bu layihənin əsas tədarükçüsü hesab olunur.

«Hətta Ermənistan və Türkiyə diplomatik əlaqələri bərpa etsələr belə, Azərbaycan Ermənistanın bu layihədə tranzit ölkə kimi iştirakına yol verməyəcək. Gürcüstan «Şahdəniz» layihəsi konsorsiumu ilə infrastrukturun idarə olunmasına dair razılaşma imzalayıb. Belə ki, bu konsorsium «Nabucco» kəmərinin doldurulması formatına qoşulduqda, imzalanan razılaşma avtomatik uzadılacaq. Ermənistan layihəyə qoşulacağı halda isə, bu razılaşma Gürcüstanı layihədən kənarlaşdırmadan qoruyacaq», - deyə nazir müavini vurğulayıb.

Qeyd edək ki, bir sıra mətbuat orqanı, o cümlədən, Türkiyənin «Star» və Rusiyanın «Kommersant» qəzetləri Ermənistan ilə Türkiyə arasında başlayan barışıq prosesi çərçivəsində Gürcüstandakı qeyri-stabil vəziyyət səbəbindən layihənin Ermənistan ərazisi ilə Türkiyəyə çəkilməsi üzrə müzakirələrə başlanması barədə məqalələr dərc edib. Yayılan məlumatlara əsasən, Avropa İttifaqı məhz bu səbəbdən Türkiyə ilə Ermənistan arasında əlaqələrin normallaşdırılması istiqamətində səylərini gücləndirib.